وەزیری بەرگریی ئێران: تۆڵەی خوێنی سەردار سولەیمانی لە بەرنامەی کاری هەمیشەیی هێزە چەکدارەکاندایە
وەزیری بەرگری و پشتیوانیی هێزە چەکدارەکانی ئێران سەندنی تۆڵەی خوێنی سەردار سولەیمانیی وەک ئەجێندای هەمیشەیی هێزە چەکدارەکانی کۆماری ئیسلامی ڕاگەیاند.
بە پێی ڕاپۆرتی ئیرنا، ئەمیری سەرتیپ «محەممەدرەزا ئاشتیانی»، وەزیری بەرگری و پشتیوانیی هێزە چەکدارەکانی ئێران، لە پەیامێکدا بە بۆنەی ساڵیادی شەهیدبوونی سەردارحاج قاسم سولەیمانی، ڕایگەیاند کە تیرۆرکردنی شەهید سولەیمانی، کە لەلایەن چەپەڵترین شێوەمرۆڤەکانی مێژووەوە ئەنجامدراوە، ئەو ڕاستییە دەردەخات کە بەڕێزی نەک هەر ڕێگایەکی دروستی لەمەڕ داکۆکی کردن لە حەقخوازان و گەلانی چەمساوەی جیهانی گرتبووە بەر، بەڵکو بۆخۆشی بوو بەو کەشتییەی ڕێشاندان کە نەتەوەی ئیسلامی بەرەو ئامانجە بەرزەکان لەوانە پشتگیریکردنی ستەملێکراوانی جیهان، ڕزگارکردنی قودسی پیرۆزو ڕزگارکردنی گەلان لە کۆت و بەندی ئیستیکباری جیهانی ڕێنوێنیی دەکات.
سەرتیپ ئاشتیانی وتیشی:سەندنی تۆڵەی خوێنی سەردار سولەیمانی لەکارنامەی هەمیشەیی هێزە چەکدارەکانی ئێراندایە، بکەرو پێکەرانی ئەم تیرۆرە ترسنۆکانەیەش لە کات و شوێنێکدا کە قەت بۆشی ناچن ، لەبەر ئەو کارە قیزەونەیان سزا دەدرێن.
وەزیری بەرگری و پشتیوانیی هێزە چەکدارەکانی ئێران جەختی لەوەش کردەوە کە کۆماری ئیسلامیی ئێران بۆخۆی کات و شوێنەکەی دیاری دەکات و سەربازەکانی ئەم ئاووخاکە بۆ ئەو ساتەوەختە مێژووییە دەستیان لە سەر پەلەپیتکەیەو ئەم بەڵێنەش لادانی بۆ نییە.
سەرداری سپەھبۆد «حاج قاسم سولەیمانی» فەرماندەی پێشووی لقی قودسی سپای پاسدارانی شۆڕشی ئیسلامی، سێھەمی ژانویەی ٢٠٢٠، لە کاتێکدا کە بە پێی بانگێشتنی فەرمیی کاربەدەستانی عێراق سەردانی ئەم وڵاتەی کردبوو، لە ھێرشی ئاسمانیی ھێزە داگیرکەرو تیرۆریستەکانی ئەمریکا لە نزیک فڕۆکەخانەی بەغدا، ھاوڕێ لەگەڵ «ئەبو مەهدی موھەندیس» جێگری سەرۆکی حەشدی شەعبی و هەشت کەس لە هاوڕێبازەکانی دیکەی شەهید کران.
