قاڵیباف: کۆمیسیۆنی هاوبەشی نێوان ئێران و ڕووسیا دەرفەتێکە بۆ بەرەنگاربوونەوەی بایکۆتەکانی ئەمریکا
سەرۆکی مەجلیسی شورای ئیسلامیی ئێران کۆمیسیۆنی باڵای هاوبەشی ئێران و ڕووسیای بە دەرفەتێکی گرنگ بۆ مامەڵەکردن لەگەڵ گەمارۆکانی ئەمریکا زانی و جەختی لەوە کردەوە کە: دەتوانین ئەو توانایانە لە پەیوەندییە دوو قۆڵی و فرەلایەنە و نێودەوڵەتییەکاندا بەکار بھێنین.
بەپێی ڕاپۆرتی هەواڵدەریی ئێران پرێس، «محەمەد باقر قاڵیباف» سەرۆکی مەجلیسی شورای ئیسلامیی ئێران، ڕۆژی دووشەممە لە کۆنگرەیەکی ڕۆژنامەوانیی هاوبەش لەگەڵ «ڤیاچێسلاڤ ڤالۆدین» سەرۆکی دومای دەوڵەتی ڕووسیا، ڕایگەیاند کە، کۆمیسیۆنی هاوبەشی نێوان ئێران و ڕووسیا دەرفەتێکە بۆ بەرەنگاربوونەوەی بایکۆتەکانی ئەمریکا.
قاڵیباف وتیشی: هەڕەشەی ئەمڕۆ بایکۆتەکانی ملھوڕانەی ئەمریکا لە دژی ڕووسیا و ئێران و وڵاتانی دیکەیە.
سەرۆکی مەجلیسی شورای ئیسلامیی ئێران هەروەها وتی: ئەم پرسانە وا دەخوازن کە بتوانین ڕێوشوێنی ستراتیژی بگرینەبەر بۆ قوڵترکردنەوەی پەیوەندییەکان لە هەموو بوارەکاندا بە هەماهەنگی و هاوکاریی زیاتری سەرکردە و بەرپرسانی هەردووک وڵات.
سەرۆکی دۆمای ڕووسیاش ڕایگەیاند کە پەیوەندییەکانی تاران و مۆسکۆ گەیشتووەتە ئاستێکی بەرز و لە ئاستی جیاوازدا فراوانتر بووە و وتیشی: ئەو بایکۆت و سزایانەی ئەمریکا و بریکارەکانیان کە بە سەر ئەم دوو وڵاتەدا سەپێنراون، دەبێتە هۆی یەکگرتنی زیاتری نێوان ئێران و ڕووسیا .
