وەزیری دەرەوەی ئێران لە پرێس کۆنفرانسێکی هاوبەش لەگەڵ سێرگئی لاورۆڤ، وەزیری دەرەوەی ڕووسیا لەتاران، ناهێمنی لە گەرووی هورمزی گەڕاندەوە بۆ دەرەنجامی راستەوخۆی دەسدرێژیی سەربازیی ئەمریکا و رژیمی زایۆنیستی دژی ئێران و پێی داگرت: ئەو دەسدرێژییە، بەشێوازی جۆراوجۆر هەروا بەردەوامە.

عەبباس عێراقچی وێڕای ئاماژە بە پەیوەندیی ستراتژیکی تاران و مۆسکۆ، وتی: دوو وڵات لەبارەی گرینگترین پرسە ناوچەیی و جیهانییەکان لەوان، رۆژاوای ئاسیا، کەنداوی فارس، دانوستانی ئێران و ئەمریکاو گۆڕانکارییەکانی ئۆکراین وتووێژیان کرد. عێراقچی هەروەها جەختی کرد لەسەر پێویستیی ڕاگرتنی جینۆساید لە فەلەستین و پاوانخوازیی رژێمی زایۆنیستی و وتی: پرسەکانی ناوچە، ڕێگاچارەی سەربازییان بۆ نییەو دەبێ لەڕێی دیپلۆماسی و ڕێکاری سیاسییەوە، پێوشوێن بگیردرێن. وەزیری دەرەوەی ڕووسیاش بەپێداگریی لەسەر درێژەی هاوکاریی نێوان دوو وڵات، ڕایگەیاند: ئاڵ و وێری بازرگانیی ئێران و ڕووسیا لە ساڵی ڕابردوودا، سەتی بیست و یەک گەشەی بووەو مۆسکۆ پێبەندی جێبەجێکردنی بەڵێنەکانیەتی پەیوەست بە وەبەرهێنان لە ئێراندا. وەزیری دەرەوەی ڕووسیا لەگەڵ سەرۆک کۆماری ئێرانیش دیدار دەکا.