توشبوون بە کۆرۆنا.. 50 ملیۆن لە جیهان و 10 ملیۆنیش لە ئەمریکا
ئامارەکانی توشبوون بە کۆرۆنا لە جیهاندا تادێت خێراتر بەرز دەبێتەوە، بەگوێرەی دوایین ئاماریش توشبوون 50 ملیۆنی تێپەڕاندووە و ئەمریکاش ڕیزبەندی یەکەمی وڵاتانی گرتووە.
بەگوێرەی پێگەی "worldometers" کە تاکە سەرچاوەی فەرمییە بۆ ڕاگەیاندنی ئامارەکانی کۆرۆنا لە جیهان، تا بڵاوکردنەوەی ئەم هەواڵە ژمارەی توشبوون بە کۆرۆنا لە جیهاندا گەیشتووەتە، 50 ملیۆن و 263 هەزار و 958 کەس.
کۆی گشتیی ئەو کەسانەشی کە بە هەمان هۆکار مردوون گەیشتووەتە یەک ملیۆن و 256 هەزار و 354 کەس لە جیهاندا.
بەگوێرەی هەمان پێگە، ئەمریکا لە ڕیزبەندی یەکەمی وڵاتانە لەڕووی توشبوون بە کۆرۆنا کە ژمارەی توشبوون تیایدا گەیشتووەتە 10 ملیۆن و 182 هەزار و 818 کەس، هەروەها لەو وڵاتە تا ئێستا 243 هەزار و 257 کەس بەهۆی کۆرۆناوە مردوون.
سەبارەت بە دوایین ئاماری عێراقیش کە ڕیزبەندی 18ی وڵاتانی گرتووە ئەوە خراوەتەڕوو، 496 هەزار و 19 کەس توشبوون و 11 هەزار و 283 کەسیش بە کۆرۆنا مردوون لەو وڵاتە.
