ھەڵکشانی ژمارەی کوژراوانی تەقینەوە تیرۆریستییەکان لە کابۆل
ئاب 27, 2021 13:13 Asia/Tehran
ژمارەی کوژراوانی تەقینەوە تیرۆریستییەکانی کابۆلی پێتەختی ئەفغانستان گەییشتە پتر لە سەد کەس.
بە پێی ڕاپۆرتەکان لە دوو تەقینەوەکەی دوێنێ پێنج شەممەی کابۆل ١٠٣ کەس کوژراون کە لەم ژمارەیە ١٣ کەسیان چەکداری ئەمریکین و نزیکەی ١٥٠ کەسیش لەو تەقینەوانەدا بریندار بوونە.
بەرلەمە ڕادەی قوربانیانی ھەردووک تەقینەوە کەی نزیک فڕگەی کابۆل ٦٠ کوژراو ڕاگەیەندرا بوو.
ئەم تەقینەوەانە یەکەم تەقینەوە بوون کە لە ماوەی ١٢ ڕۆژی ھاتنی تالیبان بۆ کابۆل ڕوویان دابوو. ھەروەھا ئەم تەقینەوانە ھاوکات لەگەڵ نزیک بوونەوە لە مۆڵەتی ٣١ی ئوتی «جۆ بایدێن» سەرۆک کۆماری ئەمریکا بۆ کشانەوەی ھێزەکانی ئەمریکی لە ئەفغانستان قەوماون.
لە ئێستادا تاقمی تیرۆریستی داعش بەرپرسایەتیی ئەنجام دانی ئەو تاوانەی بە ئەستۆ گرتووە.
