ڕاوێژی تاران و مۆسکۆ بۆ بە فەرمی ناسینی سیستێمی بانکیی میر «MIR»
ئادار 24, 2022 20:23 Asia/Tehran
باڵوێزی ئێران لە ڕووسیا دەڵێت: تاران و مۆسکۆ خەریکی ڕاوێژن لەمەڕ بە فەرمی ناسینی سیستێمی بانکیی میر «MIR».
بە پێی ڕاپۆرتی ھەواڵدەریی فارس، «کازم جەلالی» باڵوێزی ئێران لە مۆسکۆ ڕایگەیاندووە: ئێران و ڕووسیا خەریکی ڕاوێژن لەمەڕ بە فەرمی ناسینی کارتەکانی سیستێمی دراڤیی میر «MIR».
میر «MIR» سیستمێکی گواستنەوەو بژاردنی دراڤیی ژێر ڕکێفی بانکی ناوەندیی ڕووسیایە کە لە سەرتاسەری فیدراسیۆنی ڕووسیا بەکار دەھێندرێت و لە ساڵی ٢٠١٤ ەوەو دوابەدوای سەپێندرانی بیایکۆتی وڵاتانی ڕۆژئاوا بە سەر دامەزراوەکانی ڕووسیا دەستی بە چالاکی کردووە.
وەک باسی دەکرێت پتر لە سەدی ٥٠ی جەماوەری ڕووسیا لانیکەم کارتێکی بانکیی میر «MIR»یان ھەیە و پتر لە سەدی ٢٥ی کارە دراڤیەکانی ئەم وڵاتە لە ڕێگای ئەم سیستێمەوە ئەنجام دەگرێت.
