شەقامەکانی شارە جۆربەجۆرەکانی فەرەنسا بوونەتە گۆڕەپانی شەڕ
پێکدادانی توندی نێوان خۆپیشاندەرانی تووڕە لە فەرەنساو هێزەکانی پۆلیسی ئەم وڵاتە لە ناوچە جۆربەجۆرەکان شەقامەکانی فەرەنسای کردووە بە گۆڕەپانی شەڕ.
بە پێی ڕاپۆرتی کەناڵی ئاسمانیی سەحەر بە گێڕانەوە لە میدیاکانی جیھانەوە، لە ماوەی چەند ڕۆژو حەوتەی ڕابردوودا گەلی فەڕەنسا ناڕەزایەتیان دەربڕی بەرامبەر بە پلانی مەکرۆن بۆ گۆڕینی یاسای خانەنشینی و زیادکردنی تەمەنی خانەنشینی و لەم ڕووەوە هەزاران کەس لە خەڵکی فەرەنسا لە شەقامەکاندا ناڕەزایەتیان دەربڕیوە.
دوێنێش هەزاران خۆپیشاندەر لە ناوچە جیاجیاکانی فەرەنسا هاتنە سەر شەقامەکان، حکومەتیش بۆ سەرکوتکردنی نەیاران هێزی پۆلیسی تەواو چەکداری ڕەوانەی شەقامەکان کرد، هەروەها ڕووبەڕووبوونەوەی خۆپیشاندەران و پۆلیس بووە هۆی پێکدادانی توند لەنێوان هەردوولا و دیمەنگەلی وا لە ناوچە جۆربەجۆرەکانی فەرەنسا بینرا کە زیاتر لە گۆڕەپانی شەڕ دەچوو.
لە کاتێکدا مانگرتنەکان لە ناوچە جۆربەجۆرەکانی فەرەنسا پەککەوتنێکی زۆری لە کاروباری ئەم وڵاتەدا دروست کردووەو بۆ نمونە شەقامەکانی پاریس بە هۆی مانگرتنی شەخەڵڕێژەکانەوە بوونەتە زبڵدان و ئەمەش توڕەیی گەلی فەڕەنسای توندتر کردووە، حکومەت ناچارە نەیارانی سەرکوت بکات، دەستبەرداری هیچ چالاکیەک نەبووە و جگە لە هێزەکانی پۆلیس کە بە هەموو جۆرە کەرەستەیەکەوە تەیارکراون، ئۆتۆمبێلی گەورەی ئاو پژێنیشی ڕەوانەی سەر شەقامەکان کردووە بۆ بەرەوڕوو بوونەوە لەگەڵ خۆپیشاندەران.
وێنەی سەرکوتکردنی توندی نەیاران و ناڕازیانی پلانەکەی مەکرۆنی سەرۆک کۆماری فەرەنسا ڕۆژی ڕابردوو لە کاتێکدا بڵاوکرایەوە کە ئەم وڵاتە خۆی وەک لانکەی دیموکراسی لە ئەوروپا دەناسێنێ.
