کاڵاس: ئێمە پشتگیری لە بەرژەوەندییەکانی ئەوروپا دەکەین لە بەرامبەر باجەکانی ترەمپ
بەرپرسی سیاسەتی دەرەوەی یەکێتی ئەوروپا لەبارەی لێکەوتەکانی شەڕی بازرگانی ئەمریکا هۆشداریدا و جەختی لەوە کردەوە کە ئەوروپا بەرگری لە بەرژەوەندییە ئابوورییەکانی دەکات لە بەرامبەر باجی نوێی حکومەتی دۆناڵد ترەمپ
. کایا کاڵاس لە سەرووبەندی کۆبوونەوەی ناتۆ لە برۆکسل وتی: لە شەڕی بازرگانیدا کەس سەرناکەوێت. باجەکان نەک هەر نرخەکان بۆ بەکارهێنەران و کومپانیاکان بەرز دەکاتەوە، بەڵکو مەترسی لەسەر سەرمایەدانەرانی بەرگریش دروست دەکات. بەرپرسانی جیهان لە چەند ڕۆژی ڕابردوودا کاردانەوەیان بەرامبەر بە باجەکانی پڕ لە هەرا و هوریای ترەمپ نیشان دا . ئۆرسولا ڤۆن دێرلاین سەرۆکی کۆمیسیۆنی ئەوروپا بڕیارەکەی کۆشکی سپی بە "زەبرێکی قورس لە ئابووری جیهانی" ناوبرد و ڕایگەیاند "یەکەم پاکێجی کردەوەی تۆڵەسەندنەوەی ئەوروپا بۆ بەرەنگاربوونەوەی سیاسەتی ترەمپ خەریکە یەکجاری دەبێتەوە ". فرانسوا بایزۆ، سەرۆکوەزیرانی فەرەنسا هەروەها هۆشداریدا لە لێکەوتە مەترسیدارەکانی زیادکردنی باج لەلایەن ترەمپەوە و ڕایگەیاند، سیاسەتی ترەمپ هەڕەشەی لەناوبردنی دەیان هەزار هەلی کار لە کەرتە جیاوازەکانی فەرەنسا دەکات. سیاسەتی ترامپ بۆ زیادکردنی باجی گومرگی بووەتە هۆی ئەوەی ئابووری ئەمریکا خۆی ڕووبەڕووی قەیران ببێتەوە و بەهای پێوەرەکانی بۆرسە لە بازاڕە داراییەکان بە شێوەیەکی بەرچاو دابەزێ.
