وەزارەتی تەندرووستیی فەلەستین لە کەرتی غەززە ڕایگەیاند؛ ژماری شەهیدانی پەلامارەکانی سوپای ڕژێمی زایۆنی بۆ سەر کەرتی غەززە گەیشتۆتە ٤١ هەزار و ٩٦٥ کەس.

وەزارەتی تەندرووستیی فەلەستین لە کەرتی غەززە ڕاشیگەیاندووە کە لە ماوەی ٢٤ کاتژمێری ڕابردوودا سوپای ڕژێمی زایۆنی ٨ جەنایەت و کوشتاری تازەی لە کەرتی غەززەدا ئەنجام داوە کە ئەو جەنایەتانە بوونەتە هۆی شەهید بوونی ٥٦ کەس و بریندار بوونی ٢٧٨ کەسی دیکە. وەزارەتی تەندروستیی غەززە جەختی کرد کە ژمارێک لە شەهیدان و قوربانیان هێشتایش هەر لە ژێر داروپوردووی ماڵ و باڵاخانە ڕووخاوەکاندا ماونەتەوە و داگیرکەران پێش بە هێزەکانی فریاگوزار دەگرن و پێش بە دەسڕاگەیشتنیان بەو ناوچانە دەگرن. لە وەڵامی ئەم جەنایەتانە گوردانەکانی قەسامیش باسی ئەنجامدانی چەن هەڵمەتێکی کردووە دژ بە داگیرکەرانی زایۆنی و ڕایگەیاندووە کە تانکێکی "مێرکاوا ٤"ی سوپای ڕژێمی زایۆنیشی لە ڕۆژاوای ئۆردوگای جەبالیا پێکاوە و تەقاندویەتییەوە.