بزووتنەوەی خۆڕاگریی ئیسلامیی حەماس لە کاردانەوە بە بەیاننامەی ئەنجومەنی ئاشتیی غەززە، رژێمی زایۆنی بە بەرپرسیار زانی بەرامبەر بە تەشەنەسەندنی قەیرانی مرۆیی و هەروەها دواهاتەکانی لافاوەکانی ئەم دواییە لەم کەرتەدا.

حەماس جەختیشی کرد کە بەردەوامبوونی گەمارۆکان و سنووردارکردنی یارمەتییە مرۆڤدۆستانەکان، کەرەستەکانی پێویستیی نیشتەجێکردن و خۆراک و خواردن، لە تەنیشت دواخستنی پرۆسەی بنیاتنانەوە بۆتە هۆی پەرەسەندنی زیاتری ئێش و ئازاری دەیان هەزار بنەماڵەی فەلەستینی. حەماس داوای لە ئەنجومەنی ئاشتیی غەززە کردووە کە لە جیاتی دەرکردنی بەیاننامە و نیگەرانی دەربڕین، رژێمی زایۆنی ناچار بکات بە جێبەجێکردنی پابەندییەکانی وەک: کردنەوەی خێرای دەروازە سنورییەکان، هاتنی ئازادانەی یارمەتیی فریاگوزاری، و دەستپێکردنی پرۆسەی بنیاتنانەوە و ئاوەدانکردنەوەی غەززە. بزووتنەوەی خۆڕاگریی ئیسلامیی حەماس لە کۆتاییدا پێداگری کردووە کە خەڵکی غەززە زیاتر لە وادە و بەڵێن و بەیاننامە، پێویستیان بە هەنگاوی بەکردەوەیە بۆ هەڵگرتنی گەمارۆ و دابینکردنی بارودۆخی ژیانێکی ئەمن و ئینسانی.