تورکیا لە سەروبەندی خولی دووەمی هەڵبژاردنەکاندا
سبەینێ یەکشەممە جەماوەری تورکیا بۆ بەشداریکردن لە خولی دووەمی هەڵبژاردنەکانی سەرۆکایەتیی کۆماری وڵاتەکەیان دەچنە بەردەم سندوقەکانی دەنگدان.
سبەی یەکشەممە ٢٨ی مای ٢٠٢٣ قۆناغی دووەمی هەڵبژاردنی سیانزەھەمین خولی سەرۆکایەتیی تورکیا بە ئامادەبوونی «ڕەجەب تەیب ئەردۆغان» کاندیدی هاوپەیمانیی سەرۆکایەتی و «کەمال کلیچدارئۆغڵو» کاندیدی هاوپەیمانیی نەتەوەیی (کە بە مێزی شەشەم) ناسراوە، بەڕێوەدەچێت.
ئەمە یەکەمجارە هەڵبژاردنی سەرۆکایەتیی تورکیا بۆ خولی دووەم درێژ دەکرێتەوە. لە خولی یەکەمی هەڵبژاردنەکاندا کە لە ١٤ی مای ئەنجامدرا، هیچ کام لە کاندیدەکان نەیانتوانی زیاتر لە ٥٠%ی دەنگەکان بەدەست بهێنن.
بەپێی ئاماری ئەنجومەنی باڵای هەڵبژاردنەکانی تورکیا، «ئەردۆغان» بە دەستخستنی پتر لە ٢٧ ملیۆن و ٨٨ هەزار دەنگ ( کە یەکسانە بە لەسەدا ٤٩.٥ی دەنگەکان) و «کەمال کلیچدارئۆغڵو» بە پتر لە ٢٤ ملیۆن و ٥٦٨ هەزار دەنگ ( کە یەکسانە بە لەسەدا ٤٤.٨٩ی دەنگەکان) گەییشتوونەتە خولی دووەمی ئەم ھەڵبژاردنانە.
دەنگدان بۆ هەڵبژاردنەکانی تورکیا لە دەرەوەی وڵات ١٠ ڕۆژ لەمەوبەر دەستی پێکرد. لە ماوەی پێنج ڕۆژدا هاووڵاتیانی تورکیا لە ٧٣ وڵات و لە ١٦٧ نوێنەرایەتیی ئەم وڵاتە لە ناوچە جیاجیاکانی جیهان دەنگیان دا. ژمارەی بەشداربووان لە ناوچەکانی دەرەوەی تورکیا زیاتر لە یەک ملیۆن و ٩١٢ هەزار کەس ڕاگەیەندرا. سبەی دوای تەواوبوونی هەڵبژاردنی نێوخۆ دەنگەکان ئەژمار دەکرێن.
دەسەڵاتدارانی ئەنقەرە گەلێک جار هۆشدارییان داوە لە دەستوەردانی واشنتۆن و وڵاتانی ئەوروپا لە هەڵبژاردنەکانی ئەم وڵاتە. لەو چوارچێوەیەدا، «سولەیمان سۆیلو» وەزیری ناوخۆی تورکیا لە چاوپێکەوتنێکدا ئەمریکای بە دەستوەردان لە هەڵبژاردنەکانی ئەو وڵاتە تۆمەتبار کردو دەستوەردانی میدیای ڕۆژئاوای لە هەڵبژاردنی سەرۆکایەتی و پەرلەمانی تورکیا بە هاوتەریب لەگەڵ پیلانەکانی ئەمریکا زانی.
ماوەی سەرۆکایەتیی تورکیا پێنج ساڵەو بەپێی ئەو هەموارکردنەی دەستوور کە لە ساڵی ٢٠١٧ پەسەند کرا، سەرۆک کۆمار باڵاترین کاربەدەستی جێبەجێکار و سەرۆکی حکومەتە و دەسەڵاتی تەواوی هەیە لە هەڵبژاردنی وەزیر و بەرپرسانی حکومەت.
