زیاتر لە (80) بەڕێوەبەری خوێندنگەی ئامادەیی‌و بنەڕەتی لە پارێزگای هەڵەبجە، بڕیاریاندا خوێندن بایکۆت بکەن، ئەمڕۆش لە کەرکوک مامۆستایان خۆپیشاندان رێکدەخەن.

زیاتر لە (80) بەڕێوەبەڕی خوێندنگەی ئامادەیی‌و بنەڕەتی لە پارێزگای هەڵەبجە، لە هۆڵی خوێندنگەی بورهانی حاجی محەمەد کۆبونەوە.لەو کۆبونەوەیە، بەڕێوەبەرەکان بەکۆی دەنگ بڕیاریاندا رۆژی 27ی ئەیلول‌و لەیەکەم رۆژی دەستپێکی نوێی ساڵی خوێندندا، دەرگای خوێندنگاکان نەکەنەوە تا ئەوکاتەی حکومەت ناچار دەبێت مافە سەرەتاییەکانیان بۆ دابین بکات.لەلایەکی ترەوە، لقی کەرکوکی یەکێتی مامۆستایانی کوردستان بڕیاریدا ئەمڕۆ لەبەردەم بەڕێوەبەرایەتی پەروەردەی کەرکوک خۆپیشاندانی بەرفراوان رێکبخات‌و خوێندنی ئەمساڵ بایکۆت بکرێت ئەگەر وەلامی داواکارییەکانیان نەدرێتەوە. 

پێنەدانی موچەی مانگانە گەورەترین کێشەی مامۆستایانی هەرێمی کوردستانی عێراقە کە ماوەیەکی زۆرە درێژەی هەیە و تا ئێستا چەندین ناڕەزایەتی لێکەوتوەتەوە .