یەکێتی نیشتمانی کوردستان داوا دەکات بۆ کەمکردنەوەی زیاتری خەرجییەکان، پێکهاتەی ئێستای حکومەتی هەرێم بچووک بکرێتەوە.

‌ئەمڕۆ سەرکردایەتی یەکێتی نیشتمانی کوردستان کۆدەبێتەوە بۆ تاوتوێی دۆخی سیاسی کوردستان و رێککەوتنی هەرێم و بەغدا، سەرچاوەیەکی ئاگادار لەسەرکردایەتی یەکێتی بە وێستگە نیوزی راگەیاند، لەکۆبوونەوەکەدا تاوتوێی بچووککردنەوەی پێکهاتەی حکومەتی هەرێم دەکەن، چونکە ئێستا هەندێک وەزارەت و دەستە هەیە زیادەیە و خەرجییەکی زۆریشیان هەیە، بۆیە ئەگەر ئەم پێکهاتەیە بچووکتر بکرێتەوە هەم خەرجی کەم دەبێتەوە و هەمیش دەتوانرێت باشتر ئیشەکان بەڕێوە بچن.

بەوتەی ئەو سەرچاوەیە، دوای پەسەندکردنی ئەو پێشنیارە لەلایەن سەرکردایەتییەوە، دواتر پڕۆژەکە پێشکەشی حکومەتی هەرێمی کوردستان دەکەن.

کابینەی نۆیەمی حکومەتی هەرێمی کوردستان بەسەرۆکایەتی مەسرور بارزانی و قوباد تاڵەبانی، جێگری سەرۆک وەزیران، لەمانگی تەموزی ساڵی رابردوو لەلایەن پەرلەمانی کوردستانەوە متمانەی پێدراوە و لە 18 وەزارەت و سێ وەزیری هەرێم و ژمارەیەک دەستە پێکهاتووە، یەکێتی لەم کابینەیەدا جگە لەپۆستی جێگری سەرۆک وەزیران، وەزارەتەکانی (پێشمەرگە، خوێندنی باڵا، کشتوکاڵ، رۆشنبیری، پلاندانان)ی بەدەستەوەیە، لەگەڵ وەزیری هەرێم بۆ کاروباری بەغدا، جگە لەسەرۆکی چەند دەستەیەک.