وەڵامدانەوەی هەرێمی کوردستانی عێراق بە تۆمەتی قاچاخ کردنی نەوت و فرۆشتنی بە ئیسرائیل
وەزارەتی سامانە سرووشتیەکانی هەرێمی کوردستان بانگەشەکانی ھەندێک میدیای عێراقیی لەمەڕ ئەمەی کە گوایە نەوتی کوردستان لە ڕێگەی تانکەرەوە بە قاچاخ براوەو بە ئیسرائیل فرۆشراوە، ڕەت کردەوە.
بەگوێرەی زانیارییەکانی شەفەق نیوز، ڕۆژی شەممە وەزارەتی سامانە سروشتییەکانی کوردستانی عێراق لە ڕاگەیەندراوێکدا جەختی کرد؛ ئەم دەنگۆیانە سەبارەت بە فرۆشتنی نەوتی هەرێمی کوردستان بە ئیسرائیل هەوڵێکە لەلایەن دوژمنانی هەرێمەوە بۆ تێکدانی سەقامگیری و ڕێککەوتنی نێوان حکومەتی فیدراڵی و حکومەتی کوردستان.
لە ڕاگەیەندراوەکەی وەزارەتی سامانە سروشتییەکانی کوردستانی عێراقدا هاتووە: لە دۆخێکدا کە حکومەتی هەرێمی کوردستان و حکومەتی فیدراڵیی عێراق سەرقاڵی چارەسەرکردنی ئەو کێشانەن کە ماونەتەوە، ئەو لێدوان و دەنگۆیانە "بێ بنەمان" و تاکە ئامانجیشی لە کیس دانی ئەو دەرفەتە زێڕینەیە کە دوای پێکهاتنی حکومەتی تازەی عێراق بۆ چارەسەرکردنی کێشەکانی نێوان بەغدا و هەولێر ڕەخساوە.
وەزارەتی سامانە سروشتییەکانی هەرێمی کوردستانی عێراق لەم بەیاننامەیەدا جەختی لەوەش کردووەتەوە کە نەوتی کوردستان بە تەواوی لە ڕێگەی بۆرییەوە هەناردە دەکرێت و بە سەرپەرشتیی کۆمپانیای بێلایەنی نێودەوڵەتی "دیلۆیت"، ھەناردە دەکرێت ،کۆمپانیایەک کە هەمیشە ڕێز لە دەستووری عێراق و یاساکانی حکومەتى فیدراڵى دەگرێت.
