ڕاوێژکارێکی سەرۆکی هەرێمی کوردستان: بێ کۆدەنگی لایەنەکان کاتی نوێ بۆ هەڵبژاردن دیاری ناکرێت
ڕاوێژکارێکی سەرۆکی هەرێمی کوردستان رایگه‌یاند، سەرۆکی هەرێمی کوردستان هیچ بڕیارێک نادات بۆ دیاریکردنی "وادەی نوێی" هەڵبژاردنی پەرلەمانی هەرێمی کوردستان، بە بێ کۆدەنگی حزب و لایەنە کوردستانییەکان.
"زیرەک کەمال"ی ڕاوێژکاری سەرۆکی هەرێمی کوردستان، بە دەنگی ئەمریکای ڕاگەیاند، "دیاریکردنی وادەی نوێی هەڵبژاردنی پەرلەمانی کوردستان پەیوەندی بە کۆمیسیۆنی هەڵبژاردن و حزب و لایەنەکان و سەرۆکی هەرێمەوە هەیە، سەرۆکی هەرێم بەبێ کۆدەنگی هەمو لایەنەکان هیچ بڕیارێک لەوبارەیەوە نادات".
14ی ئه‌م مانگه، نێچیرڤان بارزانی سەرۆکی هەرێمی کوردستان سەردانی شاری بەغدای کرد و لەگەڵ سەرۆک وەزیرانی عێراق و سەرۆکایەتی دادگای فیدڕاڵی عێراق و بەرپرسانی تری باڵای عێراق دا کۆبوەوە.زیرەک کەمال دەڵێت، "سەردانەکەی سەرۆکی هەرێم بۆ بەغدا بۆ چارەسەرکردنی کێشە هەڵواسراوەکانی نێوان هەولێر و بەغدایە، سەردانەکە تەنها بۆ پرسی هەڵبژاردن نییە، بەڵکو بۆ بابەتی موچە و بودجە و هەڵبژاردنیشە".
کۆبونەوەی سەرۆکی هەرێمی کوردستان لەگەڵ سەرۆکایەتی دادگای فیدڕاڵی عێراق لەکاتێکدایە، لە ماوەی ڕابردودا ئەو دادگایە چەندین بڕیاری هەستیاری لەبارەی پرسی هەڵبژاردن و بودجە و موچەی فەرمانبەرانی هەرێمی کوردستان دەرکرد، بەشێک لە بڕیارەکانی نیگەرانی حکومەتی هەرێمی کوردستان و هەڵوێستی توندی پارتی لێکەوتەوە.
