لە پارێزگای کوردستان دا نزیکەی سێ ھەزارو دووسەد دۆنم باخی تووەفەرەنگی بە بەرھەمھێنانی نزیکەی ٤٥ ھەزار تەن لە ساڵ دا ھەن و لە سەدا ٧٥ی تووەفەرەنگیی وڵات لەم ناوچەیەدا بەرھەم دێت.

تووەفەرەنگی کە لە کوردستاندا لە شاژنی میوەکان دەچێت لە خۆراکی منداڵان و نەخۆشان، گەشانەوەی پێست و دابین کردنی ڤیتامینی پێویستی لەش ڕۆڵێکی کارای ھەیەو ھەڵگری پتاسیۆم، کەلیسیۆم، ئاسن، مەنیەزیۆم و سۆدیۆمە.

بەرھەمھێنانی تووەفەرەنگی لە پارێزگای کوردستان پێشینەیەکی زیاتر لە ١٥٠ ساڵەی ھەیەو کەش و ھەوا، ھەل و مەرجی ناوچەکە، بارینی بەردەوام و باخەوانی ماندوویی نەناسی کورد ھەرھەموو دەستیان داوەتە دەستی یەک ھەتا ئەم پارێزگایە بکەن بە جەمسەری بەرھەمھێنانی تووەفەرەنگی لە وڵات دا.