مانگی گوڵان مانگی چنینەوەی تووەفەرەنگییە لە پارێزگای کوردستاندا
شارەکانی سنە، مەریوان، کامیاران و سەوڵ ئاوا لە وڵاتی ئێراندا لانکی سەرەکیی بەرھەمی تووەفەرەنگی دێنە ئەژمار.
گەورەترین ڕووبەر و بەرهەمھێنانی تووەفەرەنگی لە ئێراندا ھی شارەکانی سنە، مەریوان، کامیاران و سەوڵ ئاوایەو ماوەی چەند ساڵێکە لەگەڵ ھاتنەئارای شەپۆلی چالاکیی تازەی لەم بوارەدا، بەرھەمھێنانی تووەفەرەنگی لە شارەکانی دیکەی ئەم پارێزگایە، لەوانە دیواندەرە و بیجاڕیش دەستی پێ کردووە.
یەکێک لە خاڵە بەهێزەکانی بەرهەمهێنانی تووەفەرەنگی لە پارێزگای کوردستانی ئێراندا چالاکیی بنەماڵەییە لە قۆناغی چاندن و چنینەوەی ئەم بەرهەمە کە دیارە تێچووی بەرهەمهێنانیشی کەم دەکاتەوە، ھەرچەند لەم ساڵانەی دواییدا، لەگەڵ کەمبوونەوەی حەشیمەت و کۆچکردنی گوندنشینان بۆ شارەکانی گردوپەڕ ئاستی بەرھەمھێنانی ئەم میوەناوازەیەی کوردستانیش ڕووی لە کەمبوونەوە ناوە.
بەپێی بارودۆخی کەشوهەوای ئەم پارێزگایە، یەکەمین کێڵگەکان کە تووەفەرەنگی تیایاندا پێ دەگات و دەگاتە قۆناغی چنینەوە، کێڵگەکانی کامیاران و گوندی «توریوەر»ی سەربە شارستانی سنەن.
لە مانگی جۆزەردانیشەوە یەکەم قۆناغی چنینەوەی ئەم بەرهەمە لە ناوچەکانی دیکەی پارێزگاکە دەست پێدەکات، لەوانە گوندی «شیان» کە لەم ڕۆژانەدا بە لانکی تووەفەرەنگی ناسراوە. ئەم گوندە بە دووریی ٤٥ کیلومەتری لە شاری سنە هەڵکەوتووە و ساڵانە میوانداریی فێستیڤاڵێک بە ناوی تووەفەرەنگی دەکات.
جگە لە بەڕێوەچوونی ئەم فێستیڤاڵە، ئەوەی وایکردووە ساڵانە ژمارەیەکی زۆر لە گەشتیارانی ناوخۆیی و بیانی لەم ڕۆژانەدا گەشت بۆ «شیان» بکەن، بوونی جۆرەکانی توەفەرەنگی ناوخۆییە، کە زۆر بەتامن.
لەم ڕۆژانەدا لە گوندێکی وەک شیانی سنەدا، فرۆشگای ناوخۆیی دادەنرێت و بە سەرنجدانی ئەوەی کە ئەم گوندە لەسەر ئاستی نیشتمانی لە ڕووی گەشتیارییەوە تۆمارکراوە و بووەتە شوێنێک بۆ سەردانی گەشتیاران، فرۆشتنی ڕاستەوخۆ دەرفەتێکی لە باری بۆ بەرھەمھێنەرانی ئەم میوەیە ڕەخساندووە.
