رەخنەی روحانی لە بێ توانایی یەکیەتی ئوروپا لە بەجێهێنانی بەڵێنەکانی لە رێککەوتنی ناڤۆکیدا
سەرۆکی کۆماری ئیسلامیی ئێران گوتی ، دوای کشانەوەی ئەمریکا لە رێککەوتنی ناڤۆکی ، یەکیەتی ئوروپا نەیتوانی هەنگاوێکی کاریگەر بۆ جێبەجێ کردنی بەڵێنەکانی لەم رێککەوتنەدا هەڵگرێ .
حەسەن روحانی ئەمڕۆ شەممە لە چاوپێکەوتنی ستێف بلۆک وەزیری درەوەی هولەند لە تاران ، بە ئاماژە بەوەی کە کشانەوەی ئەمریکا لە رێککەوتنی ناڤۆکی بە زیانی گەلانی ناوچەکە و جیهان و خەڵکی ئەمریکاش بووە گوتی : هەمو لا دەبێ هەوڵ بدەن رێککەوتنی ناڤۆکی بپارێزرێ و ئێران لەمبارەوە رێگای دانوستانی دانەخستووە .
روحانی بە ئاماژە بە بایکۆتە نایاساییەکانی ئەمریکا لە دژی ئێران جەختی کردەوە : بایکۆتە زاڵمانەکانی ئەمریکا تەنانەت دەوا و دەرمان و خۆراکی گەلی ئێرانیشی گرتووەتەوە و چاوەڕوانیی دەکرێ گەلانی ئازادیخوازی جیهان بە دەنگی بەرز ئەم بایکۆتە نایاساییانە شەرمەزار بکەن .
روحانی پێی داگرت : ئاسایشی رۆژاوای ئاسیا دەبێ لە لایەن وڵاتانی ناوچەکە بپارێزرێ و ئامادەبونی هێزە بیانیەکان لە ناوچەی کەنداوی فارس لە ژێر ناوی هاوپەیمانیی جیاجیا ، بە زیانی ئاسایشی ناوچەکەیە .
ستێف بلۆک وەزیری دەرەوەی هولەندیش لەم دیدارەدا وێڕای پێداگری لەسەر پێویستیی پاراستنی رێککەوتنی ناڤوکی وەک رێکەوتنێکی نێودەوڵەتیی گوتی : کشانەوەی ئەمریکا لە رێککەوتنی ناڤۆکی کارێکی دروست نەبوو .
نابراو وتیشی : دەبێ درێژە بە وتووێژەکان بددەین و دانوستان دەتوانێ رێگا چارەی کێشە و ناکۆکیەکان بێت .
