گەف و هەڕەشەی وەزیری بەرگریی تورکیا لە دژی یۆنان
وەزیری بەرگری تورکیا یۆنانی بە گرتنەبەری کردەوەی نایاسایی تۆمەتبار کرد و جەختی لەسەر وەڵامدانەوەی توندی وڵاتەکەی بەم هەنگاوانە کردەوە.
گرژییەکان لە ڕۆژهەڵاتی دەریای ناوەڕاست چەند مانگێک لەمەوبەر دەستی پێکرد و تورکیا بەدوای نەوت و گازدا دەگەڕێت لەو ئاوانەی کە قوبرس و یۆنان بانگەشەی ئەوە دەکەن ناوچەی ئابووریی تایبەتی خۆیانن.
بە پێی راپۆرتی ماڵپەڕی تی 24 ی تورکیا ، لە زاری خولوسی ئاکارەوە لە بنکەی هێزی ئاسمانی تورکیا گوتی، یۆنان وەڵامی بانگەوازەکانی ئێمەی نەداوەتەوە بۆ گفتوگۆ، بەشێک لە سیاسەتمەدارانی یۆنانیش بەردەوامن لە لێدوانی ئیستفزازی دژی تورکیا.
وتیشی: پێشبینی دەکەین بەزووترین کات دیالۆگێکی بنیاتنەر ئەنجام بدرێت و ئەو بەڵێنانەی پێمان دراوە جێبەجێ بکرێت.
خولوسی ئاکار وتی: جەختکردنەوە لەسەر ئەوەی کە ڕێگە نادەین مافەکانی وڵاتەکەمان پێشێل بکرێت، هەڕەشە نییە و چاوەڕێ دەکەین بەردەنگەکانمان لەوە تێبگەن.
ناکۆکی نێوان تورکیا و یۆنان بەینابەین لە لایەن جموجۆڵە دەریایی و ئاسمانییەکانی تورکیا و هەروەها لێدوانی بەرپرسانی یۆنان چڕتر دەبێتەوە.
