ھەڵبژاردنی تورکیا کەوتە قۆناغی دووەم
سەرۆکی دامەزراوەی باڵای هەڵبژاردنەکانی تورکیا رایگەیاند، بەهۆی ئەوەی هیچ کام لە کاندیدەکانی سەرۆکایەتی نەیانتوانیوە سەرکەوتن بەدەست بهێنن، هەڵبژاردن دەچێتە قۆناغی دووەم و رۆژی 28ی ئەم مانگە هەڵبژاردنێکی دیکە بەڕێوەدەچێت.
«ئەحمەد یەنەر» سەرۆکی دامەزراوەی باڵای هەڵبژاردنەکانی تورکیا لەمیانی کۆنگرەیەکی رۆژنامەوانیدا ڕایگەیاند: رێژەی 100%ـی دەنگەکانی کاندیدەکانی سەرۆکایەتیی جیاکرانەوە، رەجەب تەیب ئەردۆگان 49.51%ی دەنگەکان و کەمال کڵچدارئۆغڵو 44.88%ی بەدەست هێنا، هاوکات سینان ئۆغان 5.17%ی بەدەستهێنا، موحەڕەم ئینجەش کە سێ رۆژ لەمەوبەر لە هەڵبژاردنەکە کشابووەوە 0.44%ی دەنگەکانی بەدەستهێنا.
ئاماژەی بەوەشکرد، لەهەڵبژاردنی سەرۆک کۆماردا کاندیدەکان دەنگی پێویستیان بەدەست نەهێناوە و بڕیاردراوە 28ی ئەم مانگە گەڕی دوەمی دەنگدان بەڕێوەبچێت.
لە کاتژمێر 8:00ی بەیانی دوێنێ یەکشەممەوە تاوەکو کاتژمێر 5:00ی ئێوارەی هەمان ڕۆژ پڕۆسەی هەڵبژاردنی سەرۆک کۆمار و پەرلەمانی تورکیا بەڕێوەچوو.
