کاربەدەستێکی وەزارەتی کاروباری دەرەوەی ڕووسیا ڕایگەیاند کە وڵاتەکەی ئامادەیە بە مەبەستی پێشگرتن بە بەرەوڕووبوونەوەی سەربازی لەگەڵ پەیمانی باکووری ئەتڵەسی (ناتۆ) وتووێژەکانی لەگەڵ ئەم ڕێکخراوەیەدا پەرە پێ بدات.

بەپێی ڕاپۆرتی ئیتارتاس « ئلێکساندێر گروشکۆ- Alexander Grushko» یاریدەری وەزیری کاروباری دەرەوەی ڕووسیا ڕۆژی پێنج شەممە ڕایگەیاند: ڕووسیاو وڵاتانی ئەندامی ناتۆ ھۆکاری پێویستیان بۆ پێشگرتن بە ڕووداوی مەترسیداری سەربازی ھەیەو مۆسکۆ ئامادەیە لەم بوارەدا وتووێژەکان پەرە پێ بدات.

ئەم دیپلۆماتە باڵایەی ڕوسیا پێی داگرتووە: ھۆکاری زۆر لە ئارادایە بۆ ئەوەی پێش بگیردرێت لە سەرھەڵدانی ڕووداوی مەترسیداری سەربازی.

گروشکۆ وتیشی: مۆسکۆ ئامادەیە لە ئاراستەی بەرەپێش بردنی لێک گەییشتنی دوولایەنە ھەنگاو ھەڵگرێت و لەگەڵ وڵاتانی ئەندامی ناتۆ وتووێژ بکات.

بە قسەی گروشکۆ، ڕووسیا زیاتر لە دە ڕێککەوتنی لەگەڵ وڵاتانی ئەندامی ناتۆدا ھەیە کە ھەر ھەموو ئەو ڕێککەوتنانە ھاوپەیوەندن بە بابەتگەلی ئاسمانی و زەوینییەوە.

ئەم کاربەدەستە ڕووسیە ئەوەشی وەبیرھێناوەتەوە کە وڵاتەکەی چەند ساڵ لەمەوپێش ژمارەیەک بژاردەی لە بارەی چۆنیەتیی بەھێز کردنی میکانیزمە ھاوپەیوەندەکان لە ڕێگای کەناڵە دوولایەنەکانەوە داوەتە ناتۆ.

دوابەدوای ئاڵ و گۆڕەکانی ڕۆژھەڵاتی ئۆکرانیا لە ساڵی ٢٠١٤ و پەرەسەندنی ئامادە بوونی ناتۆ بە تایبەت ئەمریکا لە نزیکی سنوورەکانی ڕووسیا، بەرەوڕوو بوونەوەی سەربازییانەی ھەردووک لا تەشەنەی سەندووە.