گۆتێرێش: کات کاتی لەدەنگخستنی تفەنگەکان و دامەزراندنی ئاشتی لە ڕۆژهەڵاتی ناوەڕاستە
سکرتێری گشتیی نەتەوە یەکگرتووەکان لە یەکەم ساڵڕۆژی هێرشەکانی باهۆزی ئەقسا خوازیاری کۆتایی هاتنی خێرای "خوێنڕشتن و تووند و تیژیی تۆقێنەر لە غەززە و لوبنان بوو.
ئانتۆنیۆ گۆتێرێش لە سەروبەندی یەکەم ساڵڕۆژی هێرشەکانی حەوتەمی ئۆکتۆبەری ٢٠٢٣ لە بەیاننامەیەکدا داوای لە حەماس کرد کە دەستبەسەرکراوانی ئیسراییلی خێرا و بە بێ شەرت و مەرج ئازاد بکات و بە نیگەرانی دەربڕین بەرامبەر بە پەرەسەندنی پەلاماردرانی لوبنان وتیشی: ئەوشەڕەی پاش پەلامارە تۆقێنەرەکانی ساڵی ڕابردوو دەستپێبوو ئێستایش هەر ژیانی خەڵک تیادەبات و ئێش و ئازارێکی قووڵی داسەپاندۆتە سەر فەلەستینییەکانی دانیشتووی غەززە و ئێستایش خەڵکی لوبنان.
سکرتێری گشتیی نەتەوە یەکگرتووەکان بە ئاماژە بەوەی کە "پاش حەوتی ئۆکتۆبەر شاڵاوێکی خوێنڕشتن و تووند و تیژی تۆقێنەری وەڕێخستووە، وتی: ئێستا کات کاتی ئازادکردنی دەستبەسەرکراوانە. ئێستا کاتی لەدەنگخستنی تفەنگ و ڕاگرتنی ئەو ئازارەیە کە ناوچەکەی گرتۆتەوە. ئێستا کاتی ئاشتی، جێبەجێکردنی یاسا و ڕێسا نێودەوڵەتییەکان و دادگەرییە.
