هۆكاری دواكەوتنی ناردنی مووچە و پشكی هەرێم لەلایەن بەغدادەوە ئاشكراكرا
ئەندامێكی ئەنجومەنی نوێنەرانی عێراق هۆكاری دواكەوتنی ناردنی مووچە و پشكی هەرێمی كوردستانی عێڕاق لەلایەن بەغدادەوە ئاشكرادەكات و دەڵێت، “چەند كێشەیەكی نوێ لە نێوان هەرێم و بەغداد سەریهەڵداوە”.
غەریب ئەحمەد ئەندامی ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای رایگەیاند، ناردنی پشكی هەرێم پەیوەستە بە پابەندییەكانی هەرێمی كوردستانی عێڕاق كە دەبووایە رۆژانە 400 هەزار بەرمیل نەوت رادەستبكات ئێستا رۆژانە بە پێی بە دواداچوونەكانمان 80 هەزار بەرمیل نەوت رادەستدەكرێت و پرسی داهاتە نانەوتییەكانیش كێشەیەكی دیكەیە لە نێوان هەردوولادا.
ئاشكراشیكرد، ئێستا قەرەبووەكەی توركیاش لەسەر هەرێمی كوردستانی عێڕاق بووەتە كێشە كە توركیا و عێراق دەیانەوێت هەرێم ئەو قەرەبووە بدات و لە حاڵەتێكدا ئەگەر پابەندییەكە بخرێتە ئەستۆی هەرێم ئەوا لە پشكەكەی كە لە عێراقەوە بۆی رەوانەدەكرێت دەبڕدرێت.
بە بڕوای ئەو پەرلەمانتارە، پێویستە لێكتێگەیشتن لە نێوان هەرێم و بەغداد هەبێت و سەرۆك وەزیرانی عێراقیش وابەستەی ئەو رێككەوتنانەیە كە چێوەی هەماهەنگی پێشتر ئەنجامیداوە.
