سەرۆک وەزیرانی یەمەن: عەرەبستان و ئیمارات لەهەوڵی دابەشکردنی یەمەن لەنێو خۆیاندان
سەرۆک وەزیرانی دەوڵەتی ڕزگاریی نیشتمانیی یەمەن رۆژی پێنج شەممە لە دیمانە لەگەڵ کەناڵی ئەلمەیادینی لوبنان ڕایگەیاند، عەرەبستان و ئیمارات لەهەوڵدان یەمەن بکەنە دوو بەش و پەیوەستی خاکی خۆیانی بکەن.
بەپێی ڕاپۆری هەواڵدەریی فارس، عەبدولعەزیز بن هەبتور وتی: عەرەبستان چاوی تەماحی بڕیوەتە باکووری یەمەن وئیماراتیش بەتەمای باشووری یەمەنە.
سەرۆک وەزیرانی دەوڵەتی رزگاریی نیشتمانیی یەمەن لەمەڕ فەرمانبەرێتی ئیسماعیل وەلەد شێخ نوێنەری تایبەتی سکرتێری گشتیی ڕێکخراوی نەتەوەکان لەیەمەنیش ڕایگەیاند، "ناوبراو هیچ جۆرە بڕیاردان وڕێکارێکی پێ نەبوو و ئەوەی وا دەیخستەڕوو لەلایەن وڵاتانی دەسدرێژکار بۆسەر یەمەن، دەخرایە ئەستۆی."
عەبدولعەزیز بن هەبتور هەروەها ئیدیعاکانی عەرەبستان وئەمریکا لەمەڕ ناردنی مووشەک لە ئێرانەوە بۆ یەمەنی ڕەت کردەوەو وتی: یەمەنییەکان قەت مووشەکیان لەئێران وەرنەگرتووە.
عەرەبستان بە داکۆکیی ئەمریکاو رژیمی زایۆنیستی لەمارسی٢٠١٥وە دەستی کردووە بە دەسدرێژکاریی سەربازی بۆسەر یەمەن وئەو وڵاتەی گەمارۆی زەوینی، ئاسمانی، و دەریایی داوە.
شەڕخوازیی عەرەبستان و هاوپەیمانەکانی لە یەمەن تائێستا کوژران و برینداربوونی دەیان هەزار کەس و ئاوارەبوونی بەملوێنان یەمەنی لێکەوتووەتەوە.
هاوپەیمانیی دەسدرێژکاریی سەعوودی هەردەم ئیدیعا دەکا، ئێران چەکەمەنی و مووشەک دەخاتە بەردەست هێزە جەماوەرییەکانی یەمەن و بەم کارەی بەناو تەگەرە دەخاتە بەردەم ڕەوتی چارەسەریی قەیرانی یەمەن.
بەڵام بەرپرسانی یەمەنی بەجاران جەختیان کردووە، دەسەڵاتی بەرگریی سوپای ئەو وڵاتە تەواو خۆماڵی و سەرباری گەمارۆدرانی هەمەلایەنەی یەمەن لەلایەن رژیمی سەعوودیا، تادێ ڕوو لەپەرەیە. رژیمی سەعوودیا و ئەمریکا تائێستا لەبەر خۆڕاگریی جەماوەری یەمەن نەیانتوانیوە ئامانجەکانیان لەو وڵاتەدا مسۆگەر بکەن.
