کوژرانی پێنج شارومەندی یەمەنی لە هێرشی ئاسمانیی هاوپەیمانیی سەعودی
لە ئاکامی پەلاماری فڕۆکە جەنگییەکانی هاوپەیمانیی دەسدرێژکاری سەعودی بۆسەر پارێزگای حودەیدە لە رۆژاوای یەمەن، پێنج کەس گیانیان لەدەست دا.
بەپێی ڕاپۆری ئەمڕۆ دووشەممەی هەواڵدەریی ئیرنا بەگێڕانەوە لە کەناڵی ئەلمەسیرە، فڕۆکە جەنگییەکانی هاوپەیمانیی دەسدرێژکاری سەعودی سەرلەئێوارەی دوێنێ یەکشەممە هێرشیان کردەسەر ناوچەی "ئەلجبانە"ی شاری "ئەلحالی" پارێزگای حودەیدە کە سێ شارومەندی یەمەنی کوژران.
هەروەها بەهۆی پەلاماری فڕۆکە جەنگییەکانی هاوپەیمانیی دەسدرێژکاری سەعوودی بۆسەر مووچەو مەزراکانی ئاوایی "ئەلناشری" لە شاری"ئەلمەراوعە"ی پارێزگای حودەیدە ، دوو شارومەندی یەمەنی کوژران.
فڕۆکە جەنگییەکانی سەعوودیا ماڵی ماسیگران لە لێواری ئاوایی "مکرم"، دوورگەی"کمران" لەباکوری حودەیدەشیان بۆردومان کرد کە جارێ لەمەڕ ئاماری کوژراو و بریندارانی ئەو تاوانکارییە هیچ ڕاپۆرێک بڵاو نەبووەتەوە.
فڕۆکە جەنگییە دەسدرێژکارەکانی سەعودیا سێ جار، ناوچەی "الحجلە"، شاری "رازح"ی سەر بەپارێزگای سەعدە لەباکوری یەمەنیشیان بۆردومان کرد کە بەهۆیەوە، خەسار و زیانی زۆری دراڤی لە خەڵکانی ناوچە کەوت.
لەهەمان کاتدا، سەرچاوەیەکی سەربازیی یەمەن وتی: یەکە مووشەکی وتۆپخانەییەکانی سوپای یەمەن لە هەڵمەتێکی هاوبەشدا شوێنی گردبوونەوەی دەسدرێژکاران و بەکرێگیراوانی سەعوودی لە "ئەلنەخیلە"، بەرەی لێواری رۆژاوایان کردە ئامانج کە بەهۆیەوە دەیان کەس لە دەسدرێژکاران و بەکرێگیراوانی سەعوودی کوژران وبریندار بوون.
عەرەبستانی سەعودی بە پاڵپشتی ئەمریکاو چەند وڵاتی دیکەو بەبیانووی گەڕاندنەوەی عەبد ڕەببەمەنسور هادی سەرۆک کۆماری لەکارکشاوەی یەمەن بۆسەر دەسەڵات لەمارسی٢٠١٥ـەوە دەستی کرد بە پەلاماری سەربازی بۆسەر یەمەن و گەمارۆی زەوینی، ئاسمانی و دەریایی ئەو وڵاتەی دا.
