وەلانرانی سەرۆک وەزیرانی دەوڵەتی دەسنیای عەرەبستان لە یەمەن
سەرۆک کۆماری واز لە کارهێناوی یەمەن شەوی ڕابردوو لە بریارێکدا "ئەحمەد بن دەغڕ" سەرۆک وەزیرانی کابینەی دەسنیای عەرەبستان لە یەمەنی وەلانا و فەرمانی وەبەر لێکۆڵینەوە کەوتنی دۆسییەکەی دەرکرد.
بە پێی ڕاپۆرتی کەناڵی تەلەڤزیۆنیی سکای نیوزی عەرەبی؛ "عەبدوڕەبە مەنسوور هادی" هەروەها "موعین عەبدولمەلک" ی وەکوو سەرۆک وەزیرانی نوێ ناساند و "سالم خەنبەشی" کرد بە جێگری .
بە پێی ئەم ڕاپۆرتە؛ هۆی وەلانرانی "بن دەغر" کەمتەرخەم بوونی کابینەکەی لە بەجێ هێنانی ئەرک و ئەستۆگرییەکانیان و هەوڵ نەدان بۆ چارەسەر کردنی کێشە و گرفتی ناوچە داگیرکراوەکانی یەمەن لە لایەن حکومەتی دەسنیای سەعوودی و بەکرێگیراوانی ڕیاز لەوان دابەزینی نرخی "ڕیاڵ"ی یەمەن و بێ دەسەڵاتیان بەرامبەر بە باروودۆخی نالەباری هەنووکە ڕاگەیەندراوە.
شارەزایان لە سەر ئەو باوەڕەن کە زەخت و گوشارەکانی عەرەبستان ، مەنسوور هادیی ناچار بە وەلانانی "بن دەغر" کردووە.
"بن دەغر"ی تەمەن ٦٦ ساڵ لە ئاپریلی ٢٠١٦ بەم لاەوە جێگای "خالد بوحاح" سەرۆک وەزیرانی پێشووی کابینەی "مەنسوور هادی" گرتۆەوە.
عەرەبستان بە داکۆکیی ئەمریکا و چەن وڵاتی عەرەبی لە مارسی ٢٠١٥ـەوە بە بیانووی گەڕاندنەوەی "عەبدوڕەبە مەسنوور هادی" سەرۆک کۆماری واز لەکار هێناوی یەمەن بۆ سەر دەسەڵات، پەلاماری ئەم وڵاتەیان داوە بەڵام تا ئێستا وێڕای هەموو پەلامارە ئاسمانییەکان و گەمارۆ درانی هەمەلایەنەی یەمەن، لەبەر خۆڕاگریی خەڵکی ئەم وڵاتە نەیانتوانیوە بگەنە ئامانجەکانیان لە یەمەندا کە هەمان دەسەڵات گرتنە دەستی کەسانی دەسنیا و دارەدەستە
شەڕنانەوەکانی عەرەبستان و هاوپەیمانەکانی لە یەمەن تا ئێستا بۆتە هۆی کوژرانی پتر لە ١٤ هەزار کەس، بریندار بوونی دەیان هەزار کەس و ئاوارە بوونی بە ملوێنان یەمەنی دیکە و هەروەها تیاچوونی زۆربەی ژێرخانەکانی ئەم وڵاتە.
دەسدرێژیی سەربازیی عەرەبستان هەروەها وڵاتی هەژار و دەسکورتی یەمەنی بەرەوڕووی کەمبوونی نالەباری خۆراک و دەرمان کردۆتەوە و بۆتە هۆی پەرە سەندنی زۆر نەخۆشی و پەتایەکی نالەبار لەم وڵاتەدا.
