شاڵاوی فڕۆکە شەڕکەرەکانی سەعودی بۆ سەر پارێزگای سەعدەی یەمەن
فڕۆکە شەڕکەرەکانی ڕژێمی سەعودی لە چەند نۆرەدا ناوچە جۆربەجۆرەکانی پارێزگای سەعدەی یەمەنیان بوردومان کرد.
بە پێی ڕاپۆرتی ئیرنا فڕۆکە شەڕکەرەکانی سوپای سەعودی شەوی چوارشەممە لە چوار نۆرەدا بنکەی سەربازیی کەھلان لە ڕۆژھەڵاتی پارێزگای سەعدەیان بوردومان کرد کە ھەتا ئەم کاتە لە بارەی زیانەکانی شیمانەیی ئەم شاڵاوانەوە ڕاپۆرتێک بڵاو نەبووەتەوە.
فڕۆکە شەڕکەرە سنوور بەزێنەکانی سەعودی ھەروەھا شەوی چوارشەممە لە دوو نۆرەدا شارۆچکەی زاھیر لە پارێزگای سەعدەیان بوردومان کرد.
بڕێک لە میدیاکان باسی بیسترانی زرمەی چەند تەقینەوەیەکیان کردووە لەم ناوچەیەدا.
عەرەبستانی سەعودی بە پاڵپشتیی ئەمریکا وێڕای هاوپەیمانی لەگەڵ بڕێک لە وڵاتانی عەرەبی ناوچەکە لە شەشەمی خاکەلێوەی نەوەدوچوارەوە هێرشێکی بەربڵاوی دژی یەمەن دەست پێ کرد هەتا لەم ڕێگایەوە بتوانێ عەبدڕەبە مەنسور هادی سەرۆک کۆماری لەکارکشاوەو هەڵاتوی یەمەن بگەڕێنێتەوە بۆ سەر دەستەڵات کە لە ئەنجامی ئەم دەست درێژکارییە هەزاران شارومەندی بێ دەرەتانی یەمەنی گیانیان سپاردووەو ملوێنان کەسیش هەڵوەداو ئاوارە بوونە. ئەمە جیا لەوەی کە ژێرخانەکانی ئەم وڵاتە بە تەواوی خاپوور کراون و جەماوەری ئەم وڵاتە بەرەوڕووی دیاردەی دەگمەن و بەربڵاوی برسیەتی و نەخۆشیی بەربڵاو لەوانە کۆلێرا بوونەتەوە بە تایبەت منداڵان و بەساڵاچووان. ڕێکخراوەی نەتەوەکان ڕایگەیاندووە، بە تێکڕایی نزیکەی نۆزدە ملوێن یەمەنی بە پتر لە دوو لە سێی تێکڕای حەشیمەتی ئەم وڵاتە پێویستیان بە یارمەتی و پشتیوانییە.
بە گوێرەی ڕاگەیاندنی ئەم دامەزراوە نێونەتەوەییە، هێرشە ئاسمانییە بێ بڕانەوەکان و شەڕ لەم وڵاتەدا زەرەرو زیانێکی قورسی بەسەر جەماوەری یەمەن دا سەپاندووەو زەبرێکی قورسیشی لە ژێرخانە گشتی و تایبەتییەکانی یەمەن وەشاندووە و و هاوکات ڕێگاشی لە گەییشتنی یارمەتیی مرۆڤ دۆستانە بەم وڵاتە گرتووە.
