تیاچوونی کۆمەڵێک لە بەکرێگیراوانی سەعودی لە سنووری یەمەن
کۆمەڵێک لە لەشکریان و بەکرێگیراوانی سەعودی لە ھێرشی تۆپخانەی ھێزەکانی سوپاو لێژنە جەماوەرییەکانی یەمەن بۆ سەر ناوچە سەرسنووریەکانی جیزان و عەسیر ھەڵکەوتوو لە باشووری عەرەبستان تیاچوون.
بە پێی ڕاپۆرتی ڕۆژی پێنج شەممەی ئەلمەسیرە،سوپاو لێژنە جەماوەرییەکانی یەمەن لەشکریانی سەعودی و بەکرێگیراوەکانیان لە ناوچەی مەشریق و جەبەل قەیس لە جیزانی عەرەبستان دایە بەر پەلامار.
لە ناوچەی عەسیریش یەکەکانی تۆپخانەی سوپای یەمەن مۆڵگەی بەکرێگیراوانی سەعودییان لە بەرامبەر بوارگەی عەلەب و ناوچەی ڕەبوعەو ڕۆژئاوای ناوچەی مەجازە دایەبەر پەلامار کە لە ئەنجام دا کۆمەڵێک لە بەکرێگیراوانی سەعودی تیاچوون.
ھەر لەم حاڵەدا لە ئەنجامی شاڵاوەکانی موشەک و تۆپخانەی ڕۆژی چوارشەممەی سوپاو لێژنە جەماوەرییەکانی یەمەن لە ئەلساقیەو ئەلحەزم ھەڵکەوتوو لە پارێزگای جوف لە باکووری یەمەن کۆمەڵێک لە دەست درێژکارانی سەعودی کوژران و یان بریندار بوون.
عەرەبستانی سەعودی وێڕای پێکهێنانی هاوپەیمانی لەگەڵ بڕێک لە وڵاتانی عەرەبی ناوچەکە لە مارسی دووهەزاروپانزەوە شاڵاوێکی بەربڵاوی دژی یەمەن دەست پێ کردووە و هاوکات ئەم وڵاتەی لە وشکانی و دەریاو ئاسمانەوە گەمارۆداوە. ئەمە جیا لەوەی کە ژێرخانەکانی ئەم وڵاتە بە تەواوی خاپوور کراون و جەماوەری ئەم وڵاتە بەرەوڕووی دیاردەی دەگمەن و بەربڵاوی برسیەتی و نەخۆشیی بەربڵاو لەوانە کۆلێرا بوونەتەوە بە تایبەت منداڵان و بەساڵاچووان. ڕێکخراوەی نەتەوەکان ڕایگەیاندووە، بە تێکڕایی نزیکەی نۆزدە ملوێن یەمەنی بە پتر لە دوو لە سێی تێکڕای حەشیمەتی ئەم وڵاتە پێویستیان بە یارمەتی و پشتیوانییە .
بە گوێرەی ڕاگەیاندنی ئەم دامەزراوە نێونەتەوەییە، هێرشە ئاسمانییە بێ بڕانەوەکان و شەڕ لەم وڵاتەدا زەرەرو زیانێکی قورسی بەسەر جەماوەری یەمەن دا سەپاندووەو زەبرێکی قورسیشی لە ژێرخانە گشتی و تایبەتییەکانی یەمەن وەشاندووە و و هاوکات ڕێگاشی لە گەییشتنی یارمەتیی مرۆڤ دۆستانە بەم وڵاتە گرتووە.
توانایی بەرگریکارانەی سوپاو لێژنە جەماوەرییەکانی یەمەن سەرباری گەمارۆدرانی ھەمەلایەنەی ئەم وڵاتە لە لایەن ڕژێمی سەعودییەوە ڕۆژلەدوای ڕۆژ خەریکی پەرە سەندنە.
شەڕهەڵایساندنی عەرەبستان و ھاوپەیمانەکانی لە یەمەن ھەتا ئێستا کوژرانی پتر لە شانزە هەزار یەمەنی و بریندار بوونی دەیان هەزار کەس و هەڵوەدا بوونی ملوێنان کەس لە خەڵکی یەمەنی لێ کەوتووەتەوە.
