چڕبوونەوەی ھێرشی ڕژێمی زایۆنی بۆ سەر کەرتی غەززە
دوای ئەوەی کەرتی غەززە بۆ ماوەی چەند کاژێرێک لە هێرشەکانی ڕژێمی زایۆنی ڕزگاری بوو، سەرچاوە فەلەستینییەکان شەپۆلێکی نوێی هێرشی ئاسمانی ئەم ڕژێمەیان بۆ سەر کەرتی غەززە ڕاگەیاند.
بەپێی ڕاپۆرتی ئەلجەزیرە ئەمڕۆ چوارشەممە، لە دوایین هێرشەکانیاندا، فڕۆکەکانی سوپای داگیرکەری زایۆنی، ناوەندێکی سەر بە تاقمی خۆڕاگریی فەلەستینیان لە ڕۆژهەڵاتی ڕەفەح لە باشووری کەرتی غەززە بۆردومان کرد.
هەروەها هەلیکۆپتەرەکانی ئەم ڕژێمەش ٤ موشەکیان ئاراستەی بنکەیەکی خۆڕاگری لە ڕۆژئاوای غەززە کرد.
فڕۆکەی سیخوڕیی ڕژێمی زایۆنی ناوەندەکانی سەر بە خۆڕاگری لە «بەیت لاھیا» لە باکووری کەرتی غەززەی کردە ئامانج. ڕژێمی زایۆنی هەروەها بینۆگەیەکی پێوەندیدار بە بەرخۆدانی فەلەستینییەکان لە کەمپی پەنابەرانی شاتی لە ڕۆژئاوای شاری غەززە بۆردومان کرد.
بە پێی ئەم ڕاپۆرتە، فەلەستینییەک لە کاتی بۆردومانی ناوچەی «ئەلسەفینە» لە ڕۆژئاوای غەززە بە ھۆی فڕۆکەشەڕکەرەکانی ڕژێمی زایۆنییەوە شەهید بوو.
