فەرماندەی میحوەری رۆژئاوای کەرکووکی هێزەکانی پێشمەرگەی کوردستان رایدەگەیەنێت، کە پێشمەرگە هێرشێکی چەکدارانی ریکخراوی توندڕەوی داعشی تێکشکاند.

بەپێی راگەیەندراوێک ، کەمال کەرکووکی ، فەرماندەی میحوەری رۆژئاوای کەرکووکی هێزەکانی پێشمەرگە رایدەگەیەنێت، کە داعش لە سەعات 1:30 رۆژی دوو شەممە 4ـی تەمموزی 2016 هێرشی کردە سەر سەنگەرەکانی پێشمەرگە لە بەرزاییەکانی گوندی سەخەرە لە سنووری میحوەری رۆژئاوای کەرکووک .

هەروەک کەمال کەرکووکی رایگەیاندووە ، هێزەکانی پێشمەرگە بەرپەرچی هێرشەکەی داعشیان داوەتەوە و ژمارەیەکی زۆری چەکدارانی داعش کوژران و بریندار بوون، کە تەرمی یەکێکیان بە ناوی ئەبو ماریا (سەیف) کەوتووەتە دەست هێزەکانی پێشمەرگە .

لەو هێرشەی داعشدا، کە زیانێـکی زۆری گێانییان بەرکەوت، پێشمەرگەیەک بە سووکی بریندار بووە، کە پێویستی بە چوونە نەخۆشخانە نەبووە و ئێستاش لە سەنگەرەکان دایە و بەرگریی لە کوردستان دەکات.