شاندی حکومەتی هەرێم بۆ بودجە و دۆسیەی نەوت سەردانی بەغدا دەکاتەوە
دوای تێپەڕبوونی مانگێک بەسەر دواین سەردانی شاندی باڵای حکومەتی هەرێم بەسەرۆکایەتی قوباد تاڵەبانی بۆ بەغدا و راگەیاندنی رێککەوتنی هەولێر و بەغدا لەسەر پرسی موچە و بودجە، تائێستا ناوەڕۆکی رێککەوتنەکە جێبەجێنەکراوە و بەمەبەستی گفتوگۆکردنیش لەبارەی چۆنیەتی جێبەجێکردنی ئەو رێککەوتنە لەهەفتەی داهاتوودا شاندی حکومەتی هەرێم سەردانی بەغدا دەکاتەوە.
سەرچاوەیەکی بەرپرس لەبەغدا بە میدیای وێستگەنیوزی راگەیاند، سەرەتای هه‌فته‌ى داهاتوو شاندى باڵای حکومەتی هه‌رێمى کوردستان سه‌ردانى به‌غدا دەکات و پرسى موچه و بودجه‌ى هه‌رێمى کوردستان لەگەڵ بەرپرسانی بەغدا تاوتوێ دەکەن، ئەنجامی گفتوگۆکانی شاندەکەش دەبێتە بنەما بۆ پڕۆژەیاسای بودجە کەبڕیارە پێش مانگی شوبات دەنگی لەسەر بدرێت.
ئاماژەی بەوەشکرد، "ئه‌گه‌ر له‌و کۆبوونه‌وه‌یه‌دا هەولێر و بەغدا نه‌گه‌یشتنه ڕێککه‌وتن، ئه‌وا کاریگه‌رى نه‌رێنى دروستده‌کات له‌سه‌ر موچه‌خۆرانى هه‌رێمى کوردستان، بەوپێیەی حکومەتی هەرێم بۆ دابەشکردنی موچە پشت دەبەستێت بەهەردوو داهاتی نەوت و داهاتی ناوخۆ و بەگوێرەی داهاتی بەردەست موچە دابەش دەکات، ئەوەش مانای وایە دۆخی هەرێم دەکەوێتە حاڵەتێکی ناهەموارەوە".
سەرچاوەکە لە بارەی ئەگەری رێککەوتنی هەردوولاش باسی لەوەکرد، پێویسته حکومه‌تى هه‌رێم هه‌رچى له‌توانایدا هه‌یه له‌گه‌ڵ حکومه‌تى ناوه‌ند بیخاتەگەڕ بۆئەوەی بگاته چاره‌سه‌رێک تاوه‌کو بتوانرێت بارودۆخى دارایی هه‌رێم باشتربکرێت.
