ھاتوچۆ لە نێوان ھەرێمی کوردستانی عێراق و ئێران خێراتر دەکرێت
بەڕێوەبەری گشتیی پەیوەندییەکانی نێوان ھەرێمی کوردستان و ئێران گوتی، بەھۆی ئەنجامدانی چەند رێکارێکی پێویست ھاتوچۆ لە نێوان ھەرێم و ئێران خێراتر دەکرێت.
عەبدوڵڵا ئاکرەیی، بەڕێوەبەری گشتیی پەیوەندییەکانی نێوان ھەرێمی کوردستان و ئێران بۆ ماڵپەڕی فەرمیی پارتی گوتی: "بەردەوام گۆرانکاری لەنێوان ھەرێم و ئێران ھەیە بۆ ئەوەی خاڵە سنووریەکان بەرەو باشتر ببەین و خاڵەکان زیاتر بکەین و ئامادەکاریی باشتر بکەین و جارێکی دیکە ترانزێت لەنێوان ئێمە و ئەوان دەستپێبکاتەوە، ھاوکات ئامێری پشکنین دابنرێت و بێ ئەوەی بەدەست پشکنینی بۆ بکرێت خۆی پشکنین دەکات بەماوەیەکی کورت و دەڕوات، ئەمەش ھەنگاوێکی گرنگە بۆ خێرا ھاتووچۆکردن بەشێوەی ترانزێت لە نێوان ھەرێمی کوردستان و ئێران.
عەبدوڵڵا ئاکرەیی گوتیشی: "ئەگەر ئەو ھەنگاوە بکەوێتە بواری جێبەجێ کردنەوە زۆر گرنگە، کە رێگری لە قاچاغیش دەکرێت کە ئەمە وەکو سۆنەرە ھەر کەلوپەلێک لەناو ئۆتۆمبێل ھەبێت دیار دەبێت و ناتواندرێت فێل و قاچاغی بکرێت و ھاتووچۆ خێرا دەکات.
لەبارەی ھەڵگرتنی ڤیزە لە نێوان ھەرێم و ئێران، ئاکرەیی ڕوونیشی کردەوە: "بۆ ھەڵگرتنی ڤیزە لە نێوان ھەرێم و ئێران پێویستە ھەردوو وەزارەتی دەرەوەی عێراق و ئێران بگەنە رێککەوتن و ئەو بڕیارە بدەن، بەڵام ئێستا لەماوەی 24 کاتژمێر ڤیزە بە ھاووڵاتیان دەدرێت و ھیچ کێشەیەکیش نییە.
