نەوەی نوێ: پشتیوانی لە پێویستیی ئاگاداربوونی حکومەتی ناوەندیی عێراق دەکەین لە هەناردەکردنی نەوتی هەرێمی کوردستان
نوێنەری بزوتنەوەی نەوەی نوێ لە پەرلەمانی عێراق جەختی لە پاڵپشتیی حزبەکەی کردەوە لە مەڕ پێویستیی ئاگادار بوونەوەی حکومەتی ناوەندیی بەغدا لە شێوازی هەناردەکرانی نەوتی هەرێمی کوردستان.
«ئومێد محەممەد» وێڕای ئاماژە کردن بەوەی کە، لە پێویستیی ئاگادار بوونەوەی حکومەتی ناوەندیی بەغدا لە شێوازی هەناردەکرانی نەوتی هەرێمی کوردستان پشتیوانی دەکەین،وتیشی: هاوکات سەریشمان سوڕماوە لەو ھەنگاوانەی کە لە بارەی بودجەوە لەلایەن باڵە سیاسییەکانەوە ھەڵدەگیرێن و داوامان کردووە بڕگەیەک بخرێتە ناو پڕۆژەیاسای بودجەوە، سەبارەت بە گەڕاندنەوەی ئەو بڕە پارانەی کە بۆ پاشەکەوتی زۆرەملێ لە فەرمانبەرانی هەرێمی کوردستان بڕدراوە.
ئاماژەی بەوەشکرد: ئێمە واژۆمان لە نوێنەرانی پەرلەمانی عێراق کۆکردووەتەوە سەبارەت بە گەڕانەوەی پاشەکەوتی زۆرەملێ بۆ فەرمانبەرانی هەرێمی کوردستانی عێراق، بەڵام نوێنەرانی ئەو دوو لایەنە کوردستانییە بەشدارییان لەو بابەتەدا نەکرد.
