مامۆستایان و فەرمانبەرانی مانگرتووی سلێمانی: مانگرتن ناشکێنین
مامۆستایان و فەرمانبەرانی مانگرتوو لە سلێمانی جەختیان لەوە کردەوە کە پاشەکشە ناکەن تاوەکو داواکارییەکانیان جێبەجێ نەکرێت
لە حاڵێکدا کە قەیرانی بژێوی ژیان و دواکەوتنی مووچەی ماموستایان و فەرمانبەرانی شاری سلێمانی ناچاربە مانگرتن کردووە، حکومەتی هەرێم و بەغداش هەروا لە هەمبەر ئەم دۆخە دا بێدەنگن. مانگرتووان کە چەند ڕۆژێکە لە بارودۆخێکی سارد و سەختدا ژیان بەسەر دەبەن و ڕووبەڕووی کێشەی تەندروستیی گەورە بوونەتەوە، جەخت لەوە دەکەنەوە کە پاشەکشە ناکەن تا ئەو کاتەی داواکارییەکانیان جێبەجێ نەکرێت. مامۆستایان و فەرمانبەرانی مانگرتوو لە سلێمانی سەرەڕای برسێتی و ماندوێتی و سەرما و بای بەهێز، بەردەوامن لە پێداگری لەسەر داواکارییەکانیان و جەخت لەوە دەکەنەوە کە مانگرتنەکە ناشکێنن. ژمارەی خێمەی مانگرتووان لە بەردەم نووسینگەی نەتەوە یەکگرتووەکان لە سلێمانی لە زیادبووندایە، پشتیوانییەکانیش بۆ مانگرتنەکە لە زیادبوونە .
