ناوەندی فێربوونی زمانی فارسی لە هەولێر کرایەوە
لە درێژەی هاوکاریی کلتووریی نێوان ئێران و هەرێمی کوردستانی عێراق ناوەندێکی فێربوونی زمانی فارسی لە هەولێر کرایەوە. سەرکۆنسووڵی ئێران لە هەولێر وتی: ئەم ناوەندە لە چوارچێوی ئاڵووێری زانستی و فەرهەنگی و هەروەها دابین کردنی داخوازەکانی توێژەرانی هەرێم وەڕێخراوە.
فەرامەرز ئەسەدی، سەرکۆنسووڵی ئێران لە هەولێر ڕایگەیاند: "ئێمە لە گەلێک بواری جیاوازی زانستی، ئەکادیمی، بازرگانی و گەشتیاری خاڵی هاوبەشمان لەگەڵ هەرێم زۆرە. هاتووچۆ لە نێوان خەڵکی ئێمە و هەرێمی کوردستان بەربڵاوە و پێوەندیی زۆریان لەگەڵ یەکتر هەیە. هەربۆیە ئەمە داواکارییەک بوو لە لایەن هەرێمی کوردستانەوە بە تایبەت بۆ ئەوانەی کاری لێکۆڵینەوە و توێژینەوە دەکەن و سوود لە سەرچاوەکان بە زمانی فارسی وەردەگرن بۆ ئەوەی زمانەکە فێرببن. ئەم ناوەندەش بە هەماهەنگی هەردوو لایەن کرایەوە".ئەسەدی لەبارەی ئەوانەی دەتوانن لەم ناوەندە خۆیان تۆمار بکەن بۆ فێربوونی زمانی فارسی، وتی: "لە هەر چین و ئاستێک دەتوانن بەشداربن، بە تایبەت خوێندکارانی زانکۆ و ئەوانەی حەزیان لە نووسین و توێژینەوەیە، هەمووان دەتوانن بەشدار بن و سوود وەربگرن".ناوەندێکی دیکەی لەم چەشنە پێشتر لە شاری سلێمانی کرابوویەوە. سەبارەت بە پارێزگەکانی دیکەش، ئەسەدی وتی: " ئەگەر داوابکرێ ئێمە ئامادەی دانانی وەها ناوەندگەلێکین".
