ھاریکاری باڵای وەزیری دەرەوەی ئێران بۆ کاروباری تایبەتیی سیاسی وێڕای پێداگرتن لەسەر نایاسایی و نامرۆڤانە بوونی بایکۆتەکانی یەک لایەنەی دژی جەماوەری سووریا، داوای ھەڵگیرانی ئەو بایکۆتانەی کرد.

بە پێی ڕاپۆرتی فەرمانگەی گشتیی ڕاگەیاندن و کاروباری وتەبێژیی  وەزارەتی دەرەوە، «عەلی ئەسغەر خاجی» ھاریکاری باڵای وەزیری دەرەوەی ئێران بۆ کاروباری تایبەتیی سیاسی، ڕۆژی چوارشەممە لە پەیوەندییەکی تەلەفۆنی دا لەگەڵ «گییەر پێدێرسێن» ناردراوی تایبەتیی سکرتێری گشتیی ڕێکخراوەی نەتەوە یەکگرتووەکان بۆ کاروباری سوریا، داوای گەڕانەوەی سەقام و ئاسایشت بۆ سووریاو خەباتی دژی تیرۆریزمی کرد.

ھاریکاری باڵای وەزیری دەرەوەی ئێران بۆ کاروباری تایبەتیی سیاسی و ناردراوی تایبەتیی سکرتێری گشتیی ڕێکخراوەی نەتەوە یەکگرتووەکان بۆ کاروباری سوریا، ھەروەھا سەبارەت بە دوایین گۆڕانکارییەکانی سیاسی، مەیدانی، بابەتگەلی مرۆڤ دۆستانە،گرفتەکانی جەماوەری سووریا و بەرپاکرانی خولی دواتری دانیشتنی لێژنەی یاسای بنەڕەتیی ئەم وڵاتە بیروڕایان گۆڕییەوە.

ھەردووک لا لەم وتووێژانەدا لە سەر پێویستیی ئاراستەکرانی یارمەتیی مرۆڤ دۆستانە بە خەڵکی سووریا بە تایبەت لە ھەل و مەرجی تەشەنای کۆرۆنا، یارمەتی دانی گەڕانەوەی ئاوارەو پەناخوازان و ھەروەھا بەردەوامیی ڕەوتی سیاسی بۆ چارەسەریی ئاشتیانەی پرسی سووریا جەختیان کرد.