دیدار و چاوپێکەوتنی رۆحانی لەگەڵ ڕێبەرانی موسڵمانی ئەمریکا لە نیۆیۆرک
سەرۆکی کۆماری ئیسلامیی ئێران بەپێداگری لەسەر ئەوەی کە ئیسلام، دینی ڕەحمەت، دیموکراسی، ئاوەز، زانست، ڕاوێژکاریی و هەڵبژاردنە، وتی: ڕێگای سەرەکی بەرەنگاربوونەوەی تیرۆریزم، هەنگاوە فەرهەنگیەکان و ناساندنی ئیسلامی ڕاستەقینە بە بەرەی لاوە.
حەسەن ڕۆحانی سەرۆک کۆماری ئێران دوێشەو(سێ شەممە) لەدیدار لەگەڵ ڕێبەرانی موسڵمانی ئەمریکا لە نیۆیۆرک ئاماژەی کردە هەوڵی زلهێزان بۆ زاڵبوون بەسەر وڵاتانی ئیسلامی و وتی: زلهێزان دەیانەوێ تیرۆریزم و توندڕەویی خوازی وەک ئامرازێک بۆ کۆنترۆڵ کردنی وڵاتان، ناوزڕاوکردنی ئیسلام و موسڵمانان لەناوچەی خۆرهەڵاتی ناڤین و جیهان درێژەی بێت.
رۆحانی بەئاماژە بە کوشتاری خەڵکی بێتاوان لە ئەفریقا، خۆرهەڵاتی ناڤین، ئاسیاو ناوچەکانی دیکەی جیهان، وتی: بەداخەوە لەپاڵ کوشتنی مرۆڤە بێتاوانەکان، ئیسلامی ڕاستەقینەش دەبێتە قوربانی، هەتا بیروڕای گشتیی جیهان ڕەش بین بێت سەبارەت بە دینی ئیسلام.
ناوبراو، دینی ئیسلامی بە هێزێکی هیدایەتکەر بۆ گشت مرۆڤایەتی زانی و وتی: بەداخەوە، گرفتێکی دیکەی موسڵمانان لەپاڵ تیرۆریزمدا، جۆرێک هزر و بیرکردنەوەیە کە دەگوترێ ئیسلام نەیاری دیموکراسی، دەنگی جەماوەر، و سندوقی دەنگەکانە.
سەرۆک کۆمار، وتیشی: پێویستە مەودای نێوان ئیسلام و دەنگی جەماوەر، هەڵبژاردنەکان و دیموکراسی لەبەین ببەین.
سەرۆکی دەزگەی بەڕێوەبەرایەتی ئێران پێی داگرت: لەبارودۆخی ئێستای جیهاندا دەبێ ئیسلامی ڕاستەقینە شی بکرێتەوەو شرۆڤەیەکی شیاو و ڕاست لە قورئان، ئیسلام و شێوازی پێغەمبەری ئیسلام(د.خ) ئەنجام بگرێ هەتا کێشەو گرفتەکانی ئەمڕۆی جیهان چارەسەر بکرێن.
