هەناردەکردنی مەکینەی کشتوکاڵی بەرهەم هێنراوی ئێران بۆ وڵاتانی ناوچەکە
سەرۆکی سەندیکای بەرهەمهێنەرانی مەکینەی کشتوکاڵی ئێران، هەناردەکردنی مەکینەی کشتوکاڵی بەرهەم هێنراوی ئێران بۆ وڵاتانی ناوچەکەی ڕاگەیاند.
بە پێی ڕاپۆرتی هەواڵدەریی ڕادیۆو تەلەفزیۆنی ئێران، «حەمیدرەزا نامی» سەرۆکی سەندیکای بەرهەمهێنەرانی مەکینەی کشتوکاڵی ئێران وتی: لە ڕۆژئاوای ئاسیا تەنیا دوو وڵاتی ئێران و تورکیا تەکنۆلۆژیای بەرهەمهێنانی مەکینەی کشتوکاڵییان هەیە کە بریتین لە تراکتۆر و کۆمباین و کەرەستەی کشتوکاڵ و بەرهەمەکانی ئێرانیش لە ململانێی بازاڕدا لەگەڵ ڕکابەرەکانی لەوانە تورکیا و ئەوروپاو چین و هیندستان جێگەی خۆیانیان لە ناوچەکەدا هەیە.
نامی ڕوونیشی کردەوە: لە سەوەتەی بەرهەمهێنانی ئامێری کشتوکاڵدا هیچ بۆشایییەک لە بواری بەرهەمهێنانی هیچ ئامێرێکدا نییە و هیچ ئامێرێکیش نییە کە لە وڵاتدا بەرهەم نەهێنرێت. بە وتەی سەرۆکی سەندیکای بەرهەمهێنەرانی مەکینەی کشتوکاڵی ئێران، زۆربەی چالاکانی بواری بەرهەمهێنانی مەکینەی کشتوکاڵی لە کەرتی تایبەتدان.
گروپی پیشەسازیی تراکتۆرسازیی ئێران وەک گەورەترین بەرهەمهێنەری کەرەستەی کشتوکاڵ، لەگەڵ حەوت کۆمپانیای گردوپەڕی خۆی لە تەورێز، ٢ کۆمپانیا لە سنە و ورمێ خەریکی چالاکین و بە نزیکەی پێنج دەیە ھەوڵ دان لە بواری چێکردنی تراکتۆر، لە گۆڕەپانی بەرهەمهێنانی ٧١ جۆر بزوێنەر لە کەرتی کشتوکاڵ و پیشەسازی و ئۆتۆمبێلە چالاکی دەنوێنێ.
ئەم گرووپە پیشەسازییە وەک گەورەترین بەرهەمهێنەری تراکتۆر لە ئێران، ٩٨٪ی پێداویستیی وڵات بۆ ئەم بەرهەمە دابین دەکات و ساڵانە قەبارەیەکی بەرچاو لە بەرهەمەکانی بۆ بازاڕە جیهانییەکان لە زیاتر لە ١٥ وڵات دەنێرێت.
