گۆماوی «دوورگە سەنگی»ی نەغەدە میوانداریی لە سێ ھەزار فلامینگۆی کۆچەر دەکات
سەرپەرشتی فەرمانگەی ژینگەپارێزی نەغدە وتی:شارەزایانی ئەم فەرمانگەیە، لە میانەی چاودێرییەکانیاندا،لە گۆماوی «دوورگە سەنگی»ی ئەم شارەدا، چەند پۆلێکی گەورەی فلامینگۆی کۆچەریان، کە ژمارەیان دەگاتە زیاتر لە سێ هەزار دانە، بەدی کردووە.
ئاماژەی بەوەش دا: ئەم باڵندە کۆچەریانە بۆ ماوەیەک لە گۆماوی «دوورگە سەنگی» پشوو دەدەن و خۆراک دەخۆن و دواتر بەردەوام دەبن لە کۆچکردنیان بۆ ناوچەکانی باشووری تر.
فلامینگۆ باڵندەیەکە بە قاچ و ملی درێژو دەندوکێکی چەماوەوەوە، ئەم باڵندەیە لە ئاودا چینە دەکات و جەستەیەکی زۆر درێژ و توکنی ھەیە بە ڕەنگێکی سپی و پەمەیییەوە کە بەرزییەکەی لە نێوان ٩٠ سانتیمەتر بۆ ١.٥ مەتر دەبێت، لە کاتی فڕیندا، باڵ و ملی ھێندێک نزمتر لە جەستەی ڕادەگرێ و ڕەنگی باڵەکانیشی ڕەش و سورێکی تێکەڵە کە ھەر ئەمەش جوانییەکی تایبەتیی پێ بەخشیوەو بە هێواشی و لە سەرەخۆ دەفڕێت.
ئەم باڵندانە بە کۆمەڵ دەژین و ژمارەی ھەر پۆلێکیشیان چەند ھەزار تێپەڕ دەکات و کەنارەکانی دەریاچەی ورمێ و پارێزگای فارس گرنگترین شوێنی نیشتەجێبوونی ئەم باڵندەیەیە لە ئێران دا.
لەشاری نەغدە حەوت گۆماوی وەرزی وهەمیشەیی هەن کە ساڵانە زیاتر لە ١٠ هەزار باڵندەی کۆچەر و خۆجێیی تێدا دەژین، کە لە نێویاندا گۆماوەکانی دوورگە سەنگی، ئاق قەڵا، حەسەنلو و یادگارلو لە ڕیزی تاڵاوگە نێونەتەوەییەکان دێنە ئەژمار.
