بەردەوامیی ھەوڵی ئەردوغان بۆ دانوستانی ڕاستەوخۆی نێوان سەرۆکانی ڕووسیاو ئۆکرانیا
سەرۆک کۆماری تورکیا لە سەر ھەوڵەکانی بۆ بەرپاکردنی دانوستانی ڕاستەوخۆی نێوان سەرۆکانی ڕووسیاو ئۆکرانیا بەردەوامە.
بە پێی ڕاپۆرتی یانەی پەیامنێرانی لاو،«ڕەجەب تەیب ئەردوغان» سەرۆک کۆماری تورکیا ڕۆژی پێنج شەممە باسی بڕیاری خۆی کرد بۆ وتووێژی تەلەفۆنی لە گەڵ «ڤلادیمیر پوتین»ی سەرۆک کۆماری ڕووسیا و «ڤلۆدیمیر زلێنیسکی» سەرۆک کۆماری ئۆکرانیا.
ئەردوغان وتیشی: لەم وتووێژانەدا سەرکردەکانی ھەردووک وڵات بۆ دانوستانی ڕاستەوخۆ بانگێشتن دەکات.
سەرۆک کۆماری تورکیا وتیشی: بە نیازم بە شێوەیەکی بەبڕشتانە لەگەڵ پوتین و زلێنێسکی قسە بکەم و پێیان بڵێم کە ئامانجمان بەرپا کردنی دیدارێکە لە نێوان ھەردووک سەرۆک کۆمارەکە بە زووترین کات.
ئەمەش لە کاتێکدایە کە «دیمیتری پسکوف » وتەبێژی کۆشکی کرملین ھاوکات لەگەڵ قسەکانی ئەردوغان ڕایگەیاندووە کە لە ئێستادا ھیچ بەرنامەیەک بۆ دیداری نێوان سەرۆک کۆماری ڕووسیا لەگەڵ سەرۆک کۆماری ئۆکرانیا لە ئارادا نییە.
