تشرینی یه‌که‌م 02, 2022 16:07 Asia/Tehran
  • ئەردۆغان هەڕەشە لە سوید و فەنلاند دەکات

سەرۆک کۆماری تورکیا لە لێدوانێکدا هۆشداریدا: تا کاتێک کە بەڵینەکان جێبەجێ نەکرێن، هەڵوێستی یەکلایی خۆمان لە بواری ئەندامێتی سوید و فەنلاند لە ناتۆ درێژە دەدەین.

 

بە پێی ڕاپۆرتی ئاژانسی هەواڵی مێهر، ڕەجەب تەیب ئەردۆغان سەرۆک کۆماری تورکیا دوێنێ شەممە لە لێدوانێکدا ڕایگەیاند: تا کاتێک کە بەڵێنەکان جێبەجێ نەکرێن، هەڵوێستی بنەمایی خۆمان لە بواری ئەندامێتی سوید و فەنلاند لە ناتۆ دەپارێزین.

لە پێوەندی لە گەڵ بابەتی ئەندامێتی سوید و فەنلاند لە ناتۆ، وەزیری دەرەوەی سوید چوارشەممەی هەفتەی ڕابردوو بە ئاماژە بە درێژەی دانوستانەکانی وڵاتەکەی بۆ ئەندامێتی لە ڕێکخراوی ناتۆ لەگەڵ تورکیا ڕایگەیاند کە شاندێک لە وەزارەتی دەرەوەی سوید لەو بارەوە لە ڕۆژانی داهاتوودا سەفەری ئەنقەرە دەکەن.

ناوبراو هەروەها ڕایگەیاند چاوەڕوانین تورکیا ئەندامەتی سوید قبووڵ بکات، بەڵام نازانم ئەوە کەی ڕوو دەدات. هەفتەی ڕابردوو لەگەڵ چاوش ئۆغڵوو لە کۆبوونەوەی گشتی نەتەوەیەکگرتووەکان لەو بارەوە گفتوگۆم کرد. ئێمە پابەندی بەڵێنەکانمان لەو بارەوەین.