بەڵێنی ئەردۆغان سەبارەت بە پتەوکردنەوەی بیناکانی ئەستەمۆڵ
سەرۆک کۆماری تورکیا شەوی شەممە لە سەر یەکشەممە جێبەجێکردنی پلانی دروستکردنی بینای دژە بوومەلەرزە و چاککردنەوەی سەرجەم خانووەکانی ئەستەمۆڵی لە ماوەی پێنج ساڵی داهاتوودا ڕاگەیاند.
بەپێی هەواڵی ئاژانسی "ئانادۆڵ"، «ڕەجەب تەیب ئەردۆغان» سەرۆک کۆماری تورکیا لە میانی مەراسیمی ڕادەستکردنی خانووە گوندییەکانی پارێزگای "غازی-ئەنتەپ" لە باشووری ڕۆژئاوای تورکیا کە لە ئەنجامی بوومەلەرزەکەی ئەم دواییە کاول ببوو، بەڵێنی دروستکردنی بینای دژە بوومەلەرزە لە ئەستەمۆڵی دا.
ئەردۆغان وتیشی: حکومەتەکەی بەنیازە ساڵانە ٣٠٠ ھەزار خانوو لە ئەستەمۆڵ ئاوەدان بکاتەوە و لە ماوەی پێنج ساڵدا هیچ باڵەخانەیەکی مەترسیداریان نابێت.
سەرۆک کۆماری تورکیا هەروەها بەڵێنی دا کە ئەمساڵ ٣١٩ هەزار خانوو بە کەسانی خاوەن مەرج و شایستە بدرێت.
ئەردوغان لە ھەل و مەرجێکدا بەڵێنی پێنج ساڵە بە جەماوەری تورکیا دەدات کە ھەڵبژێردرانەوەی دووبارەی وەک سەرۆک کۆماری تورکیا تەمێکی چڕوپڕی لە سەرەو ڕوون نییە.
