هاوسەرۆکانی نوێی پارتی دیموکراتی گەلان (هەدەپە) هەڵبژێردران
لەچوارەمین کۆنگرەی نائاسایی پارتی دیموکراتی گەلان (هەدەپە)، هاوسەرۆکانی نوێی پارتەکە هەڵبژێردران‌و ژمارەی ئەندامانی سەرکردایەتی لە 100 ئه‌ندامەوە کەمکرایەوە بۆ 39 ئەندام.
ئەمڕۆ یه‌كشه‌ممه، لەناوەندی بازرگانی جیهانیی لەئەنقەرە، پارتی دیموکراتی گەلان چوارەمین کۆنگرەی خۆی بەبەشداری 904 نوێنەری پارتەکە ئەنجامدا.
بەدەنگدانی ئەندامانی كۆنگره، هەریەک لەسوڵتان ئۆزجان‌و جیهاد کرکازاک، وەک هاوسەرۆکی نوێی گشتیی هەدەپە هەڵبژێردران‌و جێگای پەروین بوڵدان‌و میتحەت سانجار، هاوسه‌رۆكانی پێشوی هه‌ده‌په‌یان گرته‌وه.
هەر لەکۆنگرەکەدا ئەنجومەنی پارت‌و لیژنە پەیوەندیدارەکان لەناو هەدەپەدا هەڵبژێردران. هەروەها ئەندامانی ئەنجومەنی پارت، ئەندامانی جێگری ئەنجومەنی پارت، ئەندامانی لیژنەی دیسپلین‌و ئەندامانی لیژنەی دانوستان هەڵبژێردران.
له‌كۆنگره‌كه‌دا ژمارەی ئەندامانی سەرکردایەتی هه‌ده‌په لە 100 ئه‌ندامەوە کەمکرایەوە بۆ 39 ئەندام، هەروەها 15 ئەندامیش بەیەدەگ هەڵبژێردران.
هەدەپە تائێستا پێنج کۆنگرەی ئاسایی‌و سێ کۆنگرەی نائاسایی بەستووە، دوایین کۆنگرەی ئاسایی ئەو پارتەش لە 3/7/2022 بوو بەدروشمی (ئێمە چارەسەرین) لەکۆنگرەکەدا پەروین بوڵدان و مەدحەت سنجار وەک هاوسەرۆکی هەدەپە هەڵبژێردرانەوە.
چوارەمین کۆنگرەی نائاسایی هەدەپە لەکاتێکدایە لەماوەی رابردودا پرسی داخستنی هەدەپە بووەتە پرسێکی گەرم لەنێو سیاسەتی تورکیا، لەو چوارچێوەدا لە 5/1/2023دا دادگای دەستوری تورکیا بڕیاریدا بەشێوەیەکی کاتی هاوکارییەکانی هەدەپە لەحكومه‌ت رابگیرێت.
هۆكارێكی دیكه‌ی كۆنگره نائاساییه‌كه‌ی هەدەپە دوای ئەوە دێت كه لەهەڵبژاردنەکانی 14ی ئایاری 2023، دەنگەکانی بەشێوەیەکی بەرچاو كه‌میكرد.
به‌جۆرێك لەنێوان ساڵانی 2013 بۆ 2015 و بەدیاریکراویش لەقۆناغی ئاشتی‌و چارەسەریی لەتورکیا، هەدەپە توانی دەنگی خۆی بگەیەنێتە لوتکەو 80 کورسی پەرلەمان بەدەستبهێنێت، بەڵام لەم هەڵبژاردنەدا بارودۆخەکە پێچەوانەبو، دەنگێکی زۆری لەدەستدا، دوای راگەیاندنی ئەندامەکانی هەڵبژاردن لە (4ی حوزەیرانی 2023)، هەریەکە لەمەتحەت سەنجارو پەروین بوڵدان، هاوسەرۆکانی هەدەپە بەهۆی ئەنجامە خراپەکانیان لەهەڵبژاردنەکان رایانگەیاند، لەکۆنگرەی پێشوەختەی پارتەکەیان خۆیان کاندید ناکەنەوە.
