وەزیری دەرەوەی ڕووسیا وتی : لەندەن لەبابەت پرسی ژەهراوی کردنی سیخوڕێکی پێشووتری ڕووسیا لە بەریتانیا پێوەندیەکانی خۆی لەگەڵ مۆسکۆ تووشی کەندوو کۆسپ کردوە .

بەپێی ڕاپۆرتی ئیرنا، سێرگێئی لاوروف، ڕۆژی هەینی وتی : ئەم وڵاتە تائێستا  بەڵگەیەکی سەبارەت بە ژەهراوی کردنی سێرگێئی  ئێسکریپال  سیخوڕی پێشووی ڕووس لە بەریتانیا وەر نەگرتووە.

لاوروف  وتیشی : دەوڵەتی بەریتانیا  سیاسەتێکی لەبەر گرتووە  کە ئامانجەکەی  پەرەسەندنی لانی زۆری قەیران لە ڕووسیایە و کاربەدەستانی بەریتانیا  هاوپەیمانانی خۆیان بۆ هەوڵی دوژمنانە بە دژی ڕووسیا ناچار دەکەن  .

 وتەبێژی  کرملینیش بە ئاماژەدان بە ڕووداوی  ژەهراوی کرانی سیخوڕی ڕووس   و هەوڵی دژە ڕووسیی بەریتانیا لەمبارەوە   پێداگری کرد  :  لەندەن بەنیاز نییە کە قەبووڵی بکات   موسکۆ چەکی شیمیایی لەبەر دەست دانییە  .

دیمیتری  پسکوڤ   ئیدیعای بەریتانیا بە دژی ڕوسیای لەم  ڕووداوەدا بە گەمژانە وەسف کرد.

دوابەدوای ژەهراوی بوونی  سێرگێئی  ئێسکریپال  سیخوڕی ڕووس  و کچەکەی  لە شاری سالزبری  بەریتانیا پێوەندی نێوان مۆسکۆ و لەندەن  ئاڵۆز بووەتەوە.

بەریتانیا لەبەر ئەم  ڕووداوە  بیست و سێ دیپلۆماتی ڕووسی  وەدەرنا.

کاربەدەستانی مۆسکۆش لە هەوڵێکی بەرامبەر دا  بیست وسێ  دیپلۆماتی بەریتانیایان وەدەرنا.