لە فێستیڤاڵێکی میوزیکیدا لە شاری هایوستنی ئەمریکا بەهۆی شەڕ و پێکدادانەوە هەشت کەس کوژران و ژمارەیەکی دیکەش برینداربوون.

میدیاکانی ئەمریکا بڵاویانکردەوە، شەوی ڕابردوو فێستیڤاڵی میوزیکیی ئاسترۆ وۆرڵد لە شاری هایوستنی ئەمریکا ئەنجامدرا، پاڵەپەستۆ و پێکدادان لە فێستیڤاڵەکەدا ڕوویداوە کاتێک “جەماوەرەکە بەرەو پێشەوەی کۆنسێرتەکە ڕۆیشتوون و لەوێدا پشێوی دروستبووە و هەشت کەس گیانیان لەدەستداوە”.

هەروەها 17 کەسیش گەیەندراونەتە نەخۆشخانە، کە 11یان کێشەی دڵیان بۆ دروستبووبوو.

ئەو پێکدادانە لەکاتێکدا ڕوویداوە کە هونەرمەندی ڕاپەر (تراڤس سکات) گۆرانی وتووە و زیاتر لە 50 هەزار کەسیش بەشداریی ئەو فێستیڤاڵەیان کردووە، بەهۆی ئەو ڕووداوانەوە ڕۆژی دووەمی فێستیڤاڵەکە هەڵوەشێندراوەتەوە.