پێلۆسی: نەتانیاهو، ڕێگری سەرەکیی بەردەم ئاشتییە، دەبێ دەست لەکار بکێشێتەوە
"نانسی پێلۆسی" سەرۆکی پێشووی ئەنجومەنی نوێنەرانی ئەمریکا وێڕای پێداگریی لەسەر ئەوەی کە سەرۆک وەزیرانی رژێمی زایۆنیستی، رێگرە لەبەردەم ڕێکاری دوو دەوڵەتیی نێوان ئەو رژێمەو فەلەستین، وتی: دەبێ نەتانیاهو دەست لەکاربکێشێتەوە.
"نانسی پێلۆسی" لەبارەی شوێنهاتەکانی هێرشی رژێمی زایۆنیستی بۆسەر غەززە کە گیانی زیاتر لە٣٤هەزار فەلەستینی گرتووە، وتی: "ئێمە سیاسەت و کردەکانی بێنیامین نەتانیاهو ڕەت دەکەینەوە".
سەرۆکی پێشووی دیموکراتی ئەنجومەنی نوێنەرانی ئەمریکا وتی: "ترسناکە. چ شتێک خرابترە لەو کارەی نەتانیاهو لە وەڵامدانەوە بە حەوتی ئۆکتۆبەر کردوویەتی؟ ئەو دەبێ دەست لەکاربکێشێتەوە. سەرەنجام، ئەو بەرپرسە".
پێلۆسی وێڕای رەخنەگرتن لە بەڕێوەبەرایەتی نەتانیاهو، وتی: نەتانیاهو، "چەندین ساڵە" ڕێگری بەردەم ئاشتی بووە لەناوچەدا. نازانم بۆچی لە ئاشتی دەترسێ و لەوبارەوە لاوازە، لەوانەشە خوازیاری ئاشتی نەبێ، بەهەرحاڵ ئەو، ڕێگری سەرەکیی بەردەم ڕێگاچارەی ئاشتییەو دەبێ واز لەدەسەڵات بێنێ.
