ئینگلیز: ترەمپ ئابووری ئەمریکای بۆ سەدەیەک دواخستەوە
دوابەدوای ناڕەزایەتییەکان بەرامبەر بە بڕیارە پڕ لە هەرا و هوریاکەی دۆناڵد ترەمپ بۆ سەپاندنی باجی قورسی بازرگانی، وەزیری دەرەوەی بەریتانیا ڕایگەیاند، ئابووری ئەمریکا بەم ڕێکارە نزیکەی سەدەیەک دواکەوتووە.
دەیڤید لێمی بە توندی ڕەخنەی لە سیاسەتی گومرگی ترەمپ گرت و وتی: ئێمە باوەڕمان بە بازرگانی ئازاد هەیە و نیگەرانین لەوەی ئەمریکا بە سەرکردایەتی ترەمپ پەنای بۆ ئەو سیاسەتانە بردووە کە دەیان ساڵ بەسەر وادەی بەسەرچوونیان تێپەڕیوە. جەختیشی لەوە کردەوە کە لەندەن ئەم بڕیارە بە هەڕەشەیەکی جددی بۆ سەر بەرژەوەندییە ئابوورییەکانی گەلەکەی دەزانێت، هۆشداریدا لەوەی بەریتانیا هیچ بژاردەیەک بۆ تۆڵەسەندنەوە لە سیاسەتی گومرگی ترەمپ بەدوور ناگرێت و هەموو ئامراز و توانای بەرگریکردن لە بەرژەوەندییە نیشتمانییەکانی هەیە. وەزیری دەرەوەی بەریتانیا ڕایگەیاند، ئێمە ڕێگە نادەین بەرژەوەندی گەلەکەمان بکرێتە قوربانی لە گەمەی هەڵبژاردنی ئەوانی تردا.
