وەزیری دارایی عێراق باسی ڕادەست کردنی بەرنووسی سەرەتایی پرۆژەیاسای چاکسازیی ئابووریی ئەم وڵاتەی کرد بە پەرلەمانی ئەم وڵاتە ھەتا کۆتایی ئەم مانگە زایینییە.

بە پێی ڕاپۆرتی ماڵپەڕی «میدێڵ ئیست نیوز»، « عەلی عەبدولئەمیر عەلاوی» وەزیری دارایی عێراق ڕۆژی چوارشەممە وێڕای ڕاگەیاندنی ئەمەی کە وڵاتەکەی ١٣٣ ملیارد دۆلار قەرزی دەرەکیی لەسەرە، وتیشی: دەوڵەت بەرەوڕووی کورتھێنانی بوجەیە و ناچارە وامی نێوخۆیی و دەرەوەیی وەربگرێت.

بەرلەمە بڕیار وا بوو دەوڵەتی «مستەفا کازمی» لە ماوەی سێ مانگ دوای دەست پێ بوونی ئەرکەکانی پرۆژەیاسای چاکسازیی ئابووریی ئاراستەی پەرلەمان بکات.

گرفتی ئابووریی گرینگترین تەنگژەی بەردەم عێراق و لەو ھۆکارە سەرەکیانەی سەرھەڵدانی خۆپیشاندانی بەردەوامی جەماوەری دژی دەوڵەتە.