بانگهێشتی فەرمیی سەرۆک وەزیرانی عێراق بۆ سەردانی تورکیا
باڵیۆزی تورکیا له عێراق به‌فه‌رمی سه‌رۆک وه‌زیرانی عێراق بانگهێشتی ئه‌نقه‌ره ده‌کات، ئه‌وه‌ش له‌دوای گرژییه‌کانی ئه‌مدواییه‌ی نێوان تورکیا و عێراق.
ڕۆژی یه‌کشه‌ممه قاسم ئه‌عره‌جی، ڕاوێژکاری ئاسایشی نیشتمانیی عێراق له‌گه‌ڵ فاتیح یه‌ڵدز، باڵیۆزی تورکیا له عێراق کۆبوه‌وه، له‌دیداره‌که‌دا په‌یوه‌ندییه‌کانی نێوان به‌غدا و ئه‌نقه‌ره تاوتوێکرا و جه‌خت له به‌هێزکردنی کرایه‌وه.
قاسم ئه‌عره‌جی به باڵیۆزی تورکیای ڕاگه‌یاندووه، په‌یوه‌ندییه‌کانی نێوان تورکیا و عێراق گرنگن و ده‌بێت کار بۆئه‌وه بکرێت سه‌رجه‌م به‌ربه‌سته‌کانی نێوان هه‌ردوو وڵات هه‌ڵبگیرێت.
له‌به‌رامبه‌ردا باڵیۆزی تورکیا له عێراق به‌فه‌رمی مسته‌فا کازمی، سه‌رۆک وه‌زیرانی عێراقی بانگهێشتی تورکیا کردووه و داوایکردووه له‌ماوه‌یه‌کی نزیکدا ئه‌و سه‌ردانه ئه‌نجامبدرێت.
به‌هۆی له‌شکرکێشی تورکیا بۆنێو خاکی عێراق و به‌رده‌وامیی بۆردوومانه‌کان، په‌یوه‌ندییه‌کانی به‌غدا و ئه‌نقه‌ره له‌ئاستێکی خراپدایه و عێراق به‌رده‌وامه له‌داوای کشانه‌وه‌ی ئه‌و هێزه‌ی تورکیا هێناویه‌تییه خاکی عێراقه‌وه.
