ھێزەکانی عێراق لە شەنگال بڵاوەیان پێ دەکرێت
«عه‌بدولئه‌میر شه‌مه‌ری» جێگری فه‌رمانده‌ی ئۆپه‌راسیۆنه هاوبه‌شه‌کانی عێراق رایگه‌یاند، نزیکه‌ی هه‌زار سه‌ربازی عێراق له شه‌نگال جێگیر ده‌که‌ن و ئه‌رکی پاراستنی ناوچه‌که له‌ئه‌ستۆ ده‌گرن.
بە پێی ڕاپۆرتی میدیاکانی عێراق ، «عه‌بدولئه‌میر شه‌مه‌ری» جێگری فه‌رمانده‌ی ئۆپه‌راسیۆنه هاوبه‌شه‌کانی عێراق جەختی لەوە کردووەتەوە کە، نزیکه‌ی ٧٥٠ بۆ هه‌زار سه‌ربازی عێراق له‌چوارچێوه‌ی رێکه‌وتنه‌که‌یان له‌گه‌ڵ هه‌رێمی کوردستان له‌شه‌نگال جێگیر ده‌کرێن و به‌هاوبه‌شی ئه‌رکی ئه‌منیه‌تی ناوچه‌که له‌ئه‌ستۆ ده‌گرن.
ناوبراو وتووشیەتی:پلانی دوباره بڵاوه‌پێکردنی هێزه ئه‌منیه‌کانیان له قه‌زای شه‌نگالی رۆژئاوای پارێزگای نه‌ینه‌وا ده‌ستی پێ کردووه.
ڕۆژی ٩ی تشرینی یه‌که‌می ئه‌مساڵ هه‌ردو حکومه‌تی به‌غدا و هه‌ولێر گه‌یشتنه ڕێککه‌وتن بۆ ئه‌وه‌ی به هاوبه‌شی شه‌نگال به‌ڕێوه‌ببه‌ن و هه‌موو گروپه چه‌کداره‌کانی قه‌زاکه‌ش دوربخه‌نه‌وه، تا له‌و رێگه‌یه‌وه ئاماده‌کاری بکه‌ن به‌مه‌به‌ستی گه‌ڕانه‌وه‌ی ئاواره‌کان بۆ زێدی خۆیان.
